Qaraǵandy oblysynda sý tasqyny jol bóligi men kópir tiregin shaıyp ketti
QARAǴANDY. QazAqparat - Qaraǵandy óńirinde sý tasqyny respýblıkalyq mańyzy bar jol bóligin jáne oblystyq mańyzy bar avtojol kópiriniń tiregin shaıyp ketti, dep habarlaıdy «QazAqparat» HAA tilshisi.
Odan bólek, erigen qar sýlary 3,5 shaqyrymnan asatyn respýblıkalyq jáne jergilikti mańyzy bar avtokólik joldarynyń 26 ýchaskesin jáne eki temir jol ýchaskelerin basyp qaldy.
«Sý aǵyny Shet aýdanyndaǵy respýblıkalyq mańyzy bar Aqshataý-Qyzylorda-Pavlodar avtojol bóligin jáne Qarqaraly aýdanyndaǵy jergilikti mańyzy bar Yntaly-Besoba jol bóligin shaıyp ketken. Sonymen birge, oblystyq mańyzy bar Jaman-Sarysý ózeni arqyly ótetin Aqsý-Aıýly-Qaıraqty-Aǵadyr-Moıynty jolynyń kópiri buzyldy», - dep habarlady TJ departamenti baspasóz qyzmetiniń jetekshisi Qýanysh Mutallapov.
«Jaman-Sarysý ózenindegi sý deńgeıiniń kóterilýine baılanysty Kóktenkól aýylynan bir jarym shaqyrymda ornalasqan Dalnıaıa bógetiniń tolyp ketý qaýpi týyndady. Sý bógetinde jarylysty boldyrmaý úshin ákimdik pen TJ departament bólimsheleriniń kúshteri bógetke qapshyqtardy úıdi jáne avtomattyq sýaǵar arnasy keńeıtildi. Júrgizilgen jumystar nátıjesinde bóget jarylysy qaýpi seıildi», - dedi Qýanysh Mutallapov.
Eldi mekenderdi erigen qar sýynan qorǵaý maqsatynda 2,3 shaqyrym topyraq tóseldi, shamamen 9 myń qapshyq toltyrylyp, bógetke qoıyldy, 700 tekshe metr sý aǵyzyldy. Apatty-qutqarý jáne shuǵyl jumystardy júrgizý kezinde oblys boıynsha 600-den astam jeke quram, 135 dana tehnıka, 6 sý tartatyn qurylǵylar jumyldyryldy.
