Qaraǵandy oblysynda sý tasqyny kezeńine daıyndyq bastaldy

QARAǴANDY. QazAqparat – Qaraǵandy oblysynda qutqarýshylar tabıǵı resýrstar jáne tabıǵat paıdalanýdy retteý basqarmasynyń mamandarymen birlesip sý tasqynyna daıyndyqty bastady. Óńirde jumysshylar jaǵalaýdy nyǵaıtyp, túbin tereńdetip jatyr, dep habarlaıdy QazAqparat tilshisi.

Jumys Nura, Solonka jáne Aqbastaý ózenderiniń jekelegen ýchaskelerinde bastaldy.

Onda tehnıka jumyldyrylyp, aǵashtardy tamyrymen julý, basqa ósimdikterdi kesý, eńisterdi josparlaý, túbin tereńdetý jáne jaǵalaýdy nyǵaıtý jumystary bastaldy.

«Buqar jyraý aýdany Ǵ. Mustafın atyndaǵy kent mańyndaǵy Nura ózeniniń ýchaskesi qaraldy. Bul jumysty «Tolaǵaı-2050» JShS merdigerlik uıymy atqaryp jatyr. 12 adam jáne 9 arnaıy tehnıka jumyldyryldy. Barlyq ýchaskedegi jumysqa 50 adam jáne 34 tehnıka qatysady», - dep habarlady Qaraǵandy oblysynyń tabıǵı resýrstar jáne tabıǵat paıdalanýdy retteý basqarmasy.

Barlyq osy sharalar sý tasqyny kezinde eldi mekenderdi sý basý qaýpin azaıtýǵa múmkindik beredi deıdi mamandar.