Qaraǵandy oblysynda sý tasqyny qaýpi bar 129 ýchaske baqylaýǵa alyndy
QARAǴANDY. QazAqparat – Búgingi tańda Qaraǵandy oblysynda 750 myń tekshe metr qar shyǵaryldy. Avtomobıl jáne temir joldardyń sý tasqyny qaýpi bar 129 ýchaskesi baqylaýǵa alyndy. 1 naýryzdan bastap TJD-ǵa kún saıyn qar jamylǵysynyń kosmomonıtorıngi týraly málimetter jiberiletin bolady, dep habarlaıdy QazAqparat tilshisi.
Qaraǵandy oblysynyń sý tasqynyna daıyndyǵy týraly óńir ákimi Jeńis Qasymbektiń tóraǵalyǵymen ótken apparattyq keńeste TJD bastyǵy Murat Qatpanov aıtyp berdi.
Respýblıkalyq mańyzy bar avtojoldarda sý ótkizý qubyrlary men kópirlerdi tazartý jumystary bastaldy. 1 naýryzdan bastap jergilikti mańyzy bar joldar men temir joldar tazalanady.
Negizgi sý qoımalarynda sanıtarlyq aǵyzý júrgiziledi. Qazgıdromettiń málimetinshe, qar men jańbyr túrindegi jaýyn-shashynnyń saldarynan Nura men Sherýbaı-Nura basseınderindegi sý qory normasynan 22-29%-ǵa artqan. Qazirgi ýaqytta kúrdeli ýchaskelerde jarylys jumystaryn júrgizýge konkýrstyq rásimder júrgizilýde.
«Ótken jyldardaǵydaı azamattyq qorǵaý kúshteri men quraldary iske qosylatyn bolady. Budan basqa, ınjenerlik, joǵary ótimdi jáne sý sorǵysh tehnıkanyń 20 birligimen kúsheıtilgen 100 adamnan turatyn jıyntyq toptama quryldy. Osynyń barlyǵy eń kúrdeli ýchaskelerge jedel baǵyttalatyn bolady», - dep esep berdi Murat Qatpanov.
TJD basshysy qalalar men aýdandar ákimderinen aryqtar men nóser kárizderiniń jaǵdaıyna erekshe nazar aýdarýdy surady. Ol jeke sektor turǵyndaryn belsendi qar erý kezeńi bastalǵanǵa deıin óz aýlalaryn jáne sý ótkizetin aryqtar men naýalardy qar men qoqystan tazartýǵa shaqyrdy.
«Barlyq ákimder men sý tasqynynyń qaýipsiz ótýine jaýapty basshylarǵa kúshter men quraldardyń joǵary daıyndyǵyn, materıaldyq-tehnıkalyq quraldardyń qajetti qoryn qamtamasyz etýdi tapsyramyn. Sý tasqyny kezeńiniń ótýi kóbinese aýa-raıyna ǵana emes, daıyndyq deńgeıine de baılanysty», - dep atap ótti Jeńis Qasymbek.
