Qaraǵandy oblysynda sý basyp ketken joldaǵy kólik qozǵalysy qalpyna keltirildi
QARAǴANDY. QazAqparat - Qaraǵandy oblysynyń Qarqaraly aýdanynda sý basyp ketken joldaǵy kólik qozǵalysy qalpyna keltirildi, dep habarlaıdy QazAqparat oblys ákimdiginiń baspasóz qyzmetine silteme jasap.
«Qarqaraly aýdanynda Nurmaqov selolyq okrýginde Egindibulaq- Aqtasty jergilikti mańyzy bar joldy sý basty.
Bulaq sýynyń deńgeıi kóterilip, sýdyń joldy basyp qalǵandyǵy anyqtaldy. Bulaqtyń arnasy muzdan tazalanyp, arnasy keńeıtildi. Joldyń astynan sý ótetin qubyrlar arshyldy, jol ústinde qatyp qalǵan muz qabaty tazalandy», - delingen habarlamada.
Qaraǵandy oblysynyń TJD baspasóz qyzmetiniń málimetinshe, qazir bulaq sýy óz arnasyna tústi, sý jol astymen aǵyp ótýde. Jaqyn mańdaǵy eldimekenge qaýip tónip turǵan joq.
