Qaraǵandy oblysynda sozylmaly naýqastardy tegin dárimen qamtý shyǵyndary ulǵaıtyldy
ASTANA. QazAqparat - «Densaýlyq» Memlekettik baǵdarlamasynyń júzege asyrylý tıimdiligi men barysy Qaraǵandy oblysy ákimdiginiń apparattyq jınalysynda talqylandy.
«Oblystyń densaýlyq saqtaý salasynyń aldyna qoıylǵan mindetterin júzege asyrýǵa 2017-shi jyly 76,4 mlrd teńge bólingen bolatyn. Ol 2016-shy jylmen salystyrǵanda 15,2%-ǵa kóbirek. 31 nysannyń kúrdeli jóndeýine 1,9 mlrd teńge jumsaldy. Ol jumystar áli de jalǵasýda: 2018-shi jyly 15 nysannyń jóndeýine 1,5 mlrd teńge qarastyrylǵan», - dep málimdedi oblystyq densaýlyq saqtaý basqarmasynyń basshysy Erjan Nurlybaev.
Qaraǵandy qalasyndaǵy Oblystyq klınıkalyq aýrýhananyń terapevtik korpýsynyń jóndeý jumystary jalǵasady. Jezqazǵanda aýrýhana qalashyǵy qalypqa keltirile bastaıdy. Shahtınskide medıtsınalyq qalashyq nysandaryn jóndeý bastalady.
Jańa medıtsınalyq jabdyqtardy satyp alýǵa oblysymyzda 1 mlrd teńge bólindi.
Bıylǵy jyly dıspanserlik esepte turǵan sozylmaly dertteri bar naýqastardy tegin dári-dármekpen qamtamasyz etýge anaǵurlym kóbirek qarajat bólindi.
«2017-shi jyly osy maqsattarǵa 8,2 mlrd teńge bólingen. Ol qarajat dárige muqtaj barlyq naýqastardy qamtýǵa jetpedi. Densaýlyq saqtaý mınıstrligimen birlesip, bul problemany sheshý joldary izdestirildi. 2018-shi jyldyń bıýdjetinde úlken soma salyndy - 13,7 mlrd teńge. Bul naýqastardy tegin dári-dármekpen 90%-ǵa deıin qamtamasyz etýge múmkindik beredi jáne sozylmaly derti bar naýqastardyń densaýlyq sapasyn jaqsartýǵa septigin tıgizedi», - dedi Erjan Nurlybaev.
Oblys ákimi bul máseleni jiti baqylaýda ustaýdy tapsyrdy. Dárilerdiń kelip túsýi apta saıyn tekserilip otyrady.
Basqarma jetekshisiniń sózinshe, densaýlyq saqtaý salasynda bıylǵy jyly memlekettik-jekemenshik áriptestik jelisi boıynsha jalpy somasy 2,4 mlrd teńgeden asatyn 10 jobany iske asyrý josparlanyp otyr. Bıznesmender Saran jáne Jańaarqa aýdanynyń Atasý kentinde gemodıalız ortalyqtaryn ashýdy, Qaraǵandy men Jezqazǵanda balalardy ońaltý ortalyqtaryn jáne oblysymyzǵa qajetti basqa da medıtsınalyq nysandardy ashýdy qarjylandyratyn bolady. Alty joba boıynsha 1-shi sáýirge deıin kelisimsharttar ornatylady.
Erlan Qoshanov densaýlyq saqtaý salasyn sandyq júıege aýystyrý boıynsha jumystardy odan ári jalǵastyrýdy tapsyrdy.
«Medıtsınalyq kómektiń qoljetimdiligi men sapasyn qamtamasyz etý máseleleri árdaıym jiti nazardy talap etedi. Bizge kelip túsetin azamattardyń shaǵymdary men úndeýleri áli de problemalar bar ekenin kórsetedi. Salalyq mamandardyń tapshylyǵy bar - sonyń saldarynan dárigerlerge qaralýǵa usyn sonar kezekter túziledi, - dep atap ótti aımaq basshysy. - Memlekettik baǵdarlamany júzege asyrýdy jalǵastyryńyzdar. Barlyq resýrstar bar, múmkindikter de bar».
