Qaraǵandy oblysynda sot front-keńsesi ashyldy
QARAǴANDY. QazAqparat - Qaraǵandy oblysynyń Shahtınsk qalalyq soty azamattarmen jumys jasaýdyń jańa formatyna kóshti, dep habarlaıdy QazAqparat tilshisi.
Shaǵyn qalada front-keńse ashyldy, onda qajetti quqyqtyq keńester alyp, daýly jaıttardy medıatorlardyń kómegimen sheshýge bolady.
«Sot qyzmeti kez kelgen memlekettik organ sııaqty, halyqtyń naqty suranystaryn qanaǵattandyrýǵa baǵyttalǵan. Muny ashyq, tez jáne sapaly jasaý óte mańyzdy. Adam az ýaqyt jumsap, barynsha joǵary nátıje alýy kerek. Búgingi tańda halyqtyń sotqa degen senim deńgeıi osyǵan baılanysty», - dedi Qaraǵandy oblystyq sotynyń tóraǵasy Nurserik Sháripov front-keńseniń ashylý saltanatynda.
Front-keńsede úsh bólim jumys isteıdi: aqparattyq ortalyq, kiris keńsesi jáne ózine-ózi qyzmet kórsetý. Keńesshiler kelýshilerdiń barlyq suraqtaryna jaýap berýge daıyn.
Kútý zaly qajetti tehnıkamen jabdyqtalǵan. Sondaı-aq jańa keńsede WI-FI ótkizilip, gadjetter úshin qýattaý qurylǵylary ornatyldy. Kelýshilerge «Sot kabıneti» AJ qyzmetin erkin paıdalanýǵa arnalǵan burysh jasalǵan.
