Qaraǵandy oblysynda sońǵy tórt kúnde 9 kólik janyp ketti
QARAǴANDY. QazAqparat – Qaraǵandy oblysynda avtokólikterdiń janý jaǵdaılary jalǵasýda. Óńirde 4 kún ishinde 9 avtokólik janyp ketken. Órt Qaraǵandy, Temirtaý, Jezqazǵan, Shahtınsk qalalarynda, Aqtoǵaı jáne Qarqaraly aýdandarynda oryn aldy, dep habarlaıdy QazAqparat tilshisi.
Aǵymdaǵy jyldyń basynan beri oblysta 207 avtokólik órti tirkeldi.
Kóbinese órtter otalý jáne elektr júıeleriniń aqaýlyǵymen baılanysty ishki tutaný kózderinen, sondaı-aq otty abaısyz paıdalanýdan týyndaıdy.
Avtokólik dızaınynda kóptegen janǵysh materıaldar qoldanylady. Bul aǵash, polımer, rezeńke-tehnıkalyq buıymdar, boıaýlar men laktar. Tejegish, salqyndatý júıelerinde, gıdravlıkalyq jabdyqta qoldanylatyn janǵysh suıyqtyqtarmen, sondaı-aq avtomobıl otynymen tolyqtyrylatyndyqtan órt paıda bolý qaýpi joǵary bolady. Sondyqtan kez kelgen avtokólikte qaýipsizdik sharalaryn qatań saqtaý qajet.
«Avtomobıl órtteriniń dınamıkasy onyń paıda bolý ornymen anyqtalady. Mysaly, turaqta turǵan jeńil avtomobıldiń motor bóliginde janǵan kezde jalyn 8-10 mınýttan keıin salonǵa deıin taralady, salon 1-3 mınýttan keıin tolyǵymen janyp ketedi. Avtomobıl janǵan kezde otyn júıesiniń tyǵyzdyǵy buzylyp, aǵyp jatqan otyn tutanady», - dep málimdedi Qaraǵandy oblystyq TJD baspasóz qyzmeti.
Kóligińizde ot shyǵý qaýpin tómendetý úshin órt sóndirýshiler kelesideı erejelerdi saqtaýdy usynady:
- avtokólikke ýaqytyly tehnıkalyq qyzmet kórsetý;
- elektr symyna erekshe nazar aýdara otyryp, onyń durys jumys isteýin únemi qadaǵalaý;
- árqashan ózińizben birge mashınada órt sóndirgish bolýy kerek, ony ózińiz úshin ońaı qol jetimdi jerde ustańyz;
- qysqy ýaqytta qatyp qalǵan bólshekterdi jylytý úshin ashyq otty paıdalanbaý kerek.
