Qaraǵandy oblysynda sońǵy 3 jylda qoqysty qaıta óńdeý kólemi segiz ese artqan
QARAǴANDY. QazAqparat - Qaraǵandy oblysynda qaıta óńdeletin qaldyqtardyń kólemi segiz esege artty.
2017 jyly ol qatty turmystyq qaldyqtardyń jalpy sanynyń 2%-yn ǵana qurady. 2019 jyldyń sońyna qaraı bul kórsetkish 16%-ǵa deıin ósti, dep habarlaıdy QazAqparat tilshisi.
Bul týraly Qoǵamdyq keńes otyrysynda Qaraǵandy oblystyq Tabıǵı resýrstar jáne tabıǵat paıdalanýdy retteý basqarmasynyń basshysy Rýslan Tólepbaev málimdedi.
«Oblysta «2018-2022 jyldarǵa arnalǵan shaǵyn jáne orta bıznes sýbektilerin keńinen tarta otyryp, qatty turmystyq qaldyqtardy qazirgi zamanǵy kádege jaratý jáne qaıta óńdeý jónindegi sharalar kesheni» ázirlendi. Qazir alǵashqy nátıjeler kórine bastady. Óńirde qatty turmystyq qaldyqtardy bólek jınaý jáne óńdeý 2015 jyldan bastap júrgiziledi. Negizinen Qaraǵandy jáne Temirtaý qalalarynda. onymen «Gorkomtrans», «Resaılıng» jáne «Ekoalem» kompanııalary aınalysady. Kelip túsken qaldyqtar suryptaýdan ótedi, onda 10 fraktsııa alynady: makýlatýra, karton, polıetılen, PET, alıýmınıı bankalar, metall, plastmassa jáne t.b», - dedi ol.
Oblysta 30-dan astam kásiporyn óńdelgen qaldyqtardan daıyn ónim shyǵarady. Qoqystardan polımerli trotýarlyq plıtkalar, jabynǵy, metallofıl, shlakobloktar, temirbeton buıymdar, káriz lıýkteri jasalady. 2018 jyly óndirilgen ónim 230 tonnadan asty. Prestelgen plastık, makýlatýra jáne basqa da birqatar shıkizat Pavlodar, Almaty jáne Reseıge jóneltiledi.
Aldaǵy jyldary qýaty jylyna 300 myń tonna bolatyn taǵy bir qoqys óńdeý zaýytynyń qurylysy josparlanyp otyr. Qazir ınvestorlarmen kelissózder júrgizilýde.
Alaıda, Rýslan Tólepbaev habarlaǵandaı, aımaqta turmystyq qatty qaldyqtardy kádege jaratý máselesi áli de ózekti bolyp tur. Qazir munda 202 polıgon jumys isteıdi. Oblys boıynsha barlyǵy 16 myńnan astam konteıner, onyń ishinde qaldyqtardy bólek jınaýǵa arnalǵan 1200 konteıner jáne quramynda synap bar aspaptardy jınaýǵa arnalǵan 66 konteıner ornatyldy.
Tabıǵı resýrstar basqarmasy basshysynyń aıtýynsha, búgingi tańda negizgi mindetterdiń biri – qaty turmystyq qaldyq polıgondaryn tártipke keltirý jáne zamanaýı standarttar boıynsha jańa qurylys salý bolyp otyr. Bul ásirese aýyldyq aýdandarǵa qajet.
