Qaraǵandy oblysynda soqyrishegi jarylýǵa shaq qalǵan júrgizýshini qutqardy
ASTANA. QazAqparat - Qaraǵandy oblysyna qarasty «Balqash» medıtsınalyq-qutqarý qyzmetiniń mamandary jol ústinde soqyrishek aýrýy qysqan júrgizýshini qutqaryp qaldy, dep habarlaıdy «QazAqparat» HAA «Apattyq medıtsına ortalyǵy» mekemesine silteme jasap.
Almaty - Ekaterınbýrg tas jolynyń boıyndaǵy júk kólikterin tekserý barysynda, polıtsııa qyzmetkerleriniń birine júrgizýshi ózin jaısyz sezinip, aýyryp turǵanyn aıtqan. Tártip saqshysy oǵan joldaǵy «Balqash» medıtsınalyq-qutqarý qyzmetine júginýge keńes beredi.
Joldaǵy medıtsına pýnktine qaralǵan kezde, Ońtústik Qazaqstan oblysynyń 1980 jyly týylǵan turǵyny ishiniń qatty aýyryp turǵanyn aıtqan. Tekseris barysynda, júrgizýshige soqyrishektiń asqynǵan túri degen dıagnoz qoıyldy. Jedel Balqash qalasyna jetkizilgen júrgizýshige ota jasaldy.
Qazir respýblıka kóleminde osyndaı qyryq jol pýnktiniń jumys istep turǵanyn esterińizge sala keteıik. Bul ortalyqtar jol apattaryna ushyraǵandarǵa uıymdasqan túrde sapaly qyzmet kórsetip keledi. Medıtsınalyq jol pýnktteriniń mamandary jol ústindegi jolaýshylarmen qatar, mańaıdaǵy turǵyndarǵa da kóńil bólip keledi.
Medıtsınalyq-qutqarý mamandarynyń kómegi qajet bolsa 112-ge qońyraý shalý kerek. Pýnktter ornalasqan jerlerdi júk kólikteriniń júrgizýshileri jaqsy biledi, sondaı-aq jol polıtsııasy qyzmetkerlerinen suraı alasyz. Siltemeler jol boıyndaǵy aqparattyq taqtalarǵa da jazylǵan.
