Qaraǵandy oblysynda soǵys ardagerleri men múgedekterine 1 mln teńgeden berildi

QARAǴANDY. QazAqparat - Jeńistiń 75 jyldyǵy qarsańynda qaraǵandylyq Ekinshi dúnıejúzilik soǵys ardagerleri men múgedekterine 1 mln teńgeden berildi. Odan bólek, natsıstik kontslagerler tutqyndaryna, Lenıngrad qorshaýynda bolǵan turǵyndarǵa, tyl eńbekkerlerine, qaıtys bolǵan maıdangerlerdiń otbasylaryna, Aýǵanstan aýmaǵyndaǵy urys qımyldaryna qatysýshylarǵa, Chernobyl AES apatyn joıýǵa qatysýshylarǵa materıaldyq kómek kórsetildi, dep habarlaıdy QazAqparat oblys ákimdiginiń baspasóz qyzmetine silteme jasap.

Qaraǵandy oblysynda qazir 67 soǵys ardageri men múgedekteri tirshilik keship jatyr. Bir rettik materıaldyq kómek olardyń jeke esep shottaryna aýdaryldy, sondaı-aq, úılerine jetkizildi.

Odan bólek, aımaqtaǵy Ekinshi dúnıejúzilik soǵys ardagerlerine teńestirilgen 101 adamǵa, ıaǵnı kontslagerlerdiń kámeletke tolmaǵan tutqyndaryna, qorshaýdaǵy Lenıngrad turǵyndary men erikti maıdan eńbekkerlerine de 200 myń teńgeden bólindi.

Qoldaý soǵys jyldary qaıtys bolǵan ardagerler men tyl eńbekkerleri otbasylaryna da kórsetilip, osy sanattaǵy 8778 adam 50 myń teńgeden aldy.

Aýǵanstanda soǵysqan jaýynger-ınternatsıonalıster (596 adam), ChAES apatyn joıýshylar (598 adam) da nazardan tys qalǵan joq. Olarǵa 100 myń teńgeden tólendi. Sonymen qatar, bıylǵy jyldyń aqpan aıynda Aýǵanstan Demokratııalyq Respýblıkasynan keńes kontıngentiniń shyǵarylýynyń 31 jyldyǵy atalyp ótkende, Qaraǵandy oblysynyń birqatar qalalary men aýdandarynda atalǵan jaýyngerlik is-qımyldarǵa qatysqandarǵa 100 myń teńgeden bólindi. Bul qarajatty 902 adam aldy.

Jalpy, Jeńistiń 75 jyldyǵy qarsańynda bólingen materıaldyq kómektiń jıyntyq somasy – 757,4 mln. teńge.

Qazaqstannyń ózge aımaqtary arasynda, Qaraǵandy oblysy tólemdi erte bastaǵanyn erekshe atap ótý kerek.