Qaraǵandy oblysynda sırek aýrýy bar balalardy emdeýge 400 mln teńgeden astam qarajat bólinedi

QARAǴANDY. QazAqparat – Qaraǵandy oblysynda Dıýshen bulshyqet dıstrofııasy bar tórt balany emdeýge medıtsınalyq saqtandyrý qory 414 mıllıon teńgeden astam qarajat bóledi, dep habarlaıdy QazAqparat tilshisi.

Dıýshen bulshyqet dıstrofııasy – dıstrofın aqýyzynyń óndirisin kodtaıtyn gendegi mýtatsııadan týyndaıtyn sırek aýrý. Bul bulshyqet talshyqtarynyń jetispeýshiligine ákeledi, olar álsireıdi jáne zaqymǵa sezimtal bolady.

Qaraǵandy oblysynda bul aýrýǵa tórt bala shaldyqqan. Olardyń ekeýi 16 jáne 17 jasta, qalalyq alǵashqy medıtsınalyq-sanıtarlyq kómek ortalyǵynda esepte tur. Olar bulshyqet tinderin qalpyna keltirýge jáne qozǵalys belsendiligin uzartýǵa baǵyttalǵan em alady. Emdeý úshin qoldanylatyn negizgi dárilerdiń biri – «Atalýren», ol bulshyqet talshyqtaryn qalpyna keltiredi. Osy jyly emhanalar jalpy quny 414 mln teńgeden asatyn osy preparattyń 4,5 myńǵa jýyq qutysyna tapsyrys bergen.

«Emdeý osyndaı patsıentterdiń ómir súrý sapasyn jaqsartýǵa baǵyttalǵan. Terapııa patsıentterdiń qozǵalys belsendiligin uzartatyn, sondaı-aq bulshyqet kúshi men júrek-ókpe qyzmetin jaqsartatyn qabynýǵa qarsy ımmýnomodýlıatsııalyq agentterdi qamtıdy. Bul jerde ata-analardyń dári-dármekterdi qabyldaý rejımin saqtaýy, jiberip almaýy óte mańyzdy. Dári-dármekterdi toqtatý naýqastyń jaǵdaıynyń nasharlaýyna ákeledi», - deıdi qalalyq MSAK ortalyǵynyń bas pedıatry Olga Kononova.

Dıýshen bulshyqet dıstrofııasy bar naýqastar tegin medıtsınalyq kómektiń kepildik berilgen kólemi sheńberinde qajetti dári-dármektermen qamtamasyz etiledi.