Qaraǵandy oblysynda shyrsha keskenderge 551 myń teńgege deıin aıyppul qaralǵan

QARAǴANDY. QazAqparat – 1 jeltoqsannan bastap Qaraǵandy, Temirtaý, Saran, Abaı, Shahtınsk jasyl aımaqtarynda, sondaı-aq Osakarov, Buqar Jyraý, Qarqaraly, Aqtoǵaı aýdandarynda qylqan japyraqty aǵashtardy kúzetý kúsheıtildi. Ol úshin 26 mobıldi top jáne 14 beket uıymdastyryldy, dep habarlaıdy QazAqparat tilshisi.

Orman qorǵaýshy ınjenerlerdiń, ormanshylardyń, ınspektorlardyń bukil kúsh-jigeri oblys aýmaǵynda táýlik boıy baqylaý men patrýldeýge baǵyttalǵan.

Qaraǵandy oblystyq orman sharýashylyǵy jáne janýarlar dúnıesi aýmaqtyq ınspektsııasy men jergilikti polıtsııa qyzmeti reıd ótkizip jatyr.

Zańda tabıǵatty qorǵaý zańnamasyn buzǵany úshin qatań jaýapkershilik qarastyrylǵan.

Jas jáne qylqan japyraqty kóshetterdiń bir danasyn joıǵany nemese búldirgeni úshin zalaldy óteý mólsheri 15 AEK (45 945 teńge) quraıdy.

Budan basqa, orman qoryna kiretin aǵash-butalardy 100 AEK-ke deıin zalal keltire otyryp, zańsyz kesý, joıý nemese zaqymdaý 100 AEK (306 300) mólsherinde aıyppul salýǵa ákep soǵady, erekshe qorǵalatyn tabıǵı aýmaqtarda jasalǵan dál osyndaı áreket úshin jeke tulǵaǵa 150 AEK (459 450 teńge) mólsherinde aıyppul salynady.

«Aǵashtar men butalardy zańsyz keskeni, joıǵany nemese búldirgeni úshin 100 AEK-ten asatyn eleýli zalal keltirilgen jaǵdaıda jeke tulǵalar 180 AEK-ke deıin (551 340 teńge) aıyppul salýǵa ne sol mólsherde túzeý jumystaryna ne 180 saǵatqa deıingi merzimge qoǵamdyq jumysqa ne múlki tárkilenip, 45 táýlikke deıin qamalady», - dep atap ótti Qaraǵandy oblysynyń tabıǵı resýrstar jáne tabıǵat paıdalanýdy retteý basqarmasy.

Sondaı-aq vedomstvo azamattarǵa tabıǵat qorǵaý zańnamasyn buzbaýǵa keńes beredi jáne zańsyz kesý týraly myna telefondarǵa habarlaýdy suraıdy:

- «Qaraǵandy orman jáne janýarlar dúnıesin qorǵaý jónindegi sharýashylyq» KMM – (8-7212) 44-29-71, 43-79-38, 8-701-514-40-86;

- «Ormandar men janýarlar dúnıesin qorǵaý jónindegi Kývskoe sharýashylyǵy» KMM – (8-72147) 9-14-98, 8-775-659-54-43;

- «Aqtoǵaı orman jáne janýarlar dúnıesin qorǵaý jónindegi sharýashylyq» KMM - (8-71037/) 2-12-10, 8-705-759-35-90.