Qaraǵandy oblysynda sheneýnikti salyq tóleýden jaltarǵany úshin jazalady
QARAǴANDY. QazAqparat - Qaraǵandy oblysy Osakarov aýdandy ákimdiginiń turǵyn úı-kommýnaldyq sharýashylyǵy bóliminiń basshysyn kólikke bereshegi jáne jalaqyny basqa esepke aýdarý arqyly tólemnen jaltarǵany úshin ákimshilik jaýapkershilikke tartý usynyldy, dep habarlady «QazAqparat» HAA tilshisi.
Aýdan prokýrorynyń orynbarasy Asqar Ábdirahmanov memlekettik qyzmet isteri departamentiniń etıka boıynsha keńes otyrysynda ol salyqty 2012 jyldan bastap tólemegenin aıtty. Eki kólikke bereshek 240 myń 794 teńgeni qurady.
«Orazbaı Býteevke qatysty atqarýshylyq óndiris qozǵaldy. Ol tólem tóleý kerektigi týraly birneshe ret habardar etilgen, biraq oǵan mán bermegen», - dedi prokýror orynbasary Ábdirahmanov.
«Laýazymdy tulǵa memorgannyń bas býhgalterlerine qysym jasap, onyń jalaqysynan ózi qaryz somany ustaýǵa kedergi keltirip otyrǵan. Býteev óz ótinishi negizinde ustalatyn tólemdi óz erkimen azaıtqan. Sońǵy alty aıda býhgalterııa Orazbaı Býteevtiń ótinishimen onyń jalaqysyn kúıeý balasyna aýdaryp otyrǵan. Býteev jeke shoty buǵattalǵanyn aıtyp, býhgalterııany jańylystyrǵan. Etıka boıynsha keńeske shaqyrtylǵan Býteev «KamAZ» júk kóligi úshin salyq tólemegenin ony jalǵa bergendigimen túsindirdi. Al jalaqysyn kúıeý balasy men qyzyna olarǵa qajet bolǵan soń aýdarǵanyn aıtty. Keńes músheleri daýys berip, ákimge sheneýniktiń laýazymyn tómendetý týraly sheshim qabyldady.
«Siz Memlekettik qyzmet týraly» jáne «Sybaılas jemqorlyqqa qarsy is-qımyl týraly» zańnyń 27-babynyń talaptaryn buzdyńyz. Qazirgi ýaqytta eskertý túrinde tártiptik jazańyz bar», - dedi etıka boıynsha keńes basshysy Jandos Sársenov.
«Memlekettik qyzmetshi bola tura, siz qasaqana sot sheshimin oryndaýdan jaltardyńyz jáne memlekettik kirister basqarmasynyń talabyn elemedińiz. Sizdiń áreketińiz memlekettik bılik bedeline nuqsan keltirip, memlekettik qyzmet, tutastaı memlekettik organ júıesiniń ımıdjine teris yqpal etedi».
