Qaraǵandy oblysynda sheneýnikterge qatysty qylmystyq is qozǵaldy
Molodejnyı kentinde jóndelgen joldardyń sapasyn tekserý jergilikti turǵyndardyń shaǵymynan keıin bastaldy. «Aýyl – El besigi» baǵdarlamasy boıynsha kentishilik joldardy jóndeýge 500 mln teńge bólingen. Bul qarajatqa 13 km jol retke keltirilýi tıis bolatyn. Alaıda, jańa asfalt bir jyl ótpesten buzyla bastaǵan.
Dálirek aıtsaq, aýyl joldaryn jóndeý ótken jyldyń qazan aıynda aıaqtaldy. Jeti aıdan keıin, osy jyldyń mamyr aıynda jańa jabynda shuńqyrlar paıda boldy. Keıbir ýchaskelerde jóndeý tipte eki ret júrgizilip úlgergen.
Alaıda, jergilikti ákimdik qyzmetkerleri jańa asfalttyń tez buzylýyna osy joldarmen júretin júk kólikteri kináli dep otyr.
«Komarov kóshesinde jaryqtar paıda boldy, óıtkeni munda aýyr júk mashınalary jıi júredi. Bizde belgiler bar, biraq kórip otyrǵanymyzdaı, aýyr júk kólikteri olardy elemeı, osy jolmen júre beredi. Polıtseıler osy kemshilikterdi birigip joıý úshin atsalysýy kerek», - deıdi Molodejnyı kenti ákimi apparatynyń bas mamany Svetlana Ionova.
Jobalyq-smetalyq qujatqa sáıkes jańa asfalt jabynynyń qalyńdyǵy 4 santımetrdi quraıdy. Bul joldarmen aýyr júk kólikteri júrýine ruqsat etilýi úshin bul kórsetkish eki ese joǵary bolýy kerek, deıdi merdigerler.
Jaǵdaıdyń anyq-qanyǵyna jetý úshin jergilikti turǵyndar áleýmettik jelilerde shaǵym jarııalady. Oǵan oblystyń sybaılas jemqorlyqqa qarsy qyzmeti den qoıyp, tekseris júrgizgen.
«Áleýmettik jelilerge monıtorıng jasaı otyryp, Molodejnyı kentiniń turǵynynan joldardyń sapasy týraly ótinish jarııalanǵany anyqtaldy. Sybaılas jemqorlyqqa qarsy qyzmettiń aralasýynan keıin jóndeý jumystary oryndala bastady. Sondaı-aq, qylmystyq is qozǵaldy», – dedi «Saryarqa – Adaldyq alańy» jobalyq keńsesiniń basshysy Malıka Qúsenbaeva.
