Qaraǵandy oblysynda shegirtkemen kúres sharalary júrip jatyr
ASTANA. QazAqparat - Qaraǵandy oblysynyń 90 myń gektardan astam alqaptarynda shegirtkege qarsy óńdeý jumystary júrgizilip jatyr. Bul sharalarǵa qajetti qarajat respýblıkalyq jáne oblystyq bıýdjetten bólindi, dep habarlaıdy Qaraǵandy oblysy ákimdiginiń baspasóz qyzmeti.
Ákimdik málimetterine qaraǵanda, eń kóp óńdeý jumystary Ulytaý jáne Jańaarqa aýdandarynda ótkizilýde. Zııankestermen kúres jerde de, aýada da júrip jatyr. Aldyn ala júrgizilgen sharalardyń arqasynda oblysta shegirtkelermen baılanysty másele uzaq ýaqyttan beri týmaǵan edi.
«Oblysymyzdyń toǵyz aýdanynda fıtosanıtarlyq dıagnostıka respýblıkalyq ádistemelik ortalyǵynyń fılıaldary qyzmet etip jatyr. Mamandar aýmaqtardy zerttep, jyl saıyn zııankesterge qatysty boljam jasaıdy, qansha alqaptardy óńdeý kerektigin esepteıdi. Shegirtkeler qaptaýynyń sharyqtaý shegi 2000-shy jyldardyń basynda bolǵan. Sol kezde 800 myń ga jerdi óńdeýge týra keldi. Sodan soń olar azaıa bastady. Keı jyldary nebári 40 myń ga jerdi óńdegen kezder de boldy. 2016 jyly óńdelgen jerlerdiń aýdany 134 myń ga bolǵan, al bıylǵy jyly boljam boıynsha 93 myń ga», - dedi oblystyq aýmaqtyq ınspektsııa jetekshisiniń orynbasary Ázilhan Abaqanov.
Onyń sózinshe, shegirtkelerge qarsy óńdeý jumystaryn oblystyń bes aýdanynda ótkizý qajet. Ol - Aqtoǵaı, Jańaarqa, Nura jáne Ulytaý aýdandary, sonymen qatar Qarajal qalasy.
«Shegirtke joıylyp jatqan alqaptardyń jartysynan kóbi Jańaarqa aýdanyna tıesili - 41,3 myń ga. Al Ulytaý aýdanynda 38 myń ga óńdeledi. Óńdeý jumystaryna búrikkishteri bar mıkrondar, gaz generatorlar jáne asa jeńil avıatsııa - deltalettar men ushaqtar jumyldyrylǵan. Zııankesterdi joıýda sońǵy býyn pestıtsıdteri paıdalanylady»,-dedi ınspektsııa jetekshisiniń orynbasary.
