Qaraǵandy oblysynda shalǵaı aýyldarǵa mobıldi dárihanalar qatynaýda
Áleýmettik joba týraly Densaýlyq saqtaý basqarmasynyń basshysy Gamal Toqsambaev aıtyp berdi.
«Alǵashqy jyljymaly dárihanalardy 2020 jyly eń shalǵaı aýdandar – Ulytaý jáne Aqtoǵaı aýdandaryna satyp aldyq. Mysaly, Aqtoǵaı aýdanynda birde-bir jeke dárihana bolmaǵan, sondyqtan turǵyndar úshin bul másele ózekti edi. Jyljymaly dárihanalar ózderin aqtady. Qazir olarmen oblystyń barlyq aýdandary qamtamasyz etilgen. Joba oblystyq bıýdjetten qarjylandyryldy. Búgin barlyq 9 jyljymaly keshen aýyl turǵyndary úshin qyzmet kórsetýde. Olar dári-dármek qoryn tolyqtyrý úshin aýdandardan oblys ortalyǵyna keldi», – dep túsindirdi vedomstvo basshysy.
Gamal Toqsambaevtyń aıtýynsha, mobıldi dárihanalardyń assortımenti úlken – 2,5 myń ataýǵa deıin. Dári-dármekter kóterme saýdagerlerden satyp alynady, bólshek saýda úshin ústeme baǵa nebári 5% quraıdy. Bul aýyl turǵyndarynyń ýaqyty men aqshasyn únemdeıdi.
«Jyljymaly dárihana pýnkti qarasha aıynan bastap jumys isteıdi. Aýdanda 27 eldi meken bar. Kúndelikti júrý kestesi bar. Avtodárihana olarǵa qashan keletinin adamdar aldyn ala bilip otyrady. Dári-dármek assortımentin ulǵaıtýǵa tyrysamyz jáne jeke tapsyrystar qabyldaımyz. Árıne, bul turǵyndar úshin yńǵaıly jáne paıdaly. Óıtkeni keıbir aýyldardan taksımen aýdan ortalyǵyna barý 5–6 myń teńgeni quraıdy», – dedi Nura aýdanynyń ortalyq aýdandyq aýrýhanasynyń dırektory Oral Mazıtov.
Osakarov aýdanynda mobıldi dárihana jeltoqsan aıynda iske qosyldy. Turǵyndar artyqshylyqtardy baǵalap úlgerdi.
«Bul jaqsy kómek. Bizdiń aýdanda 46 eldi meken bar. Kommertsııalyq dárihanalar barlyq aýyldarda bola bermeıdi, tek eń úlkenderinde. Kún saıyn, aldyn ala bekitilgen keste boıynsha jyljymaly dárihanalar júrip turady. Adamdar óte rıza», – deıdi ıÝlııa Býhkamer, Osakarov aýdanynyń ortalyq aýdandyq aýrýhanasy dırektorynyń orynbasary.
Jyljymaly dárihanalardyń shyǵý kestesi Densaýlyq saqtaý basqarmasynyń Instagram paraqshasynda ornalastyrylǵan.
