Qaraǵandy oblysynda shalǵaı aýyldarǵa kóshpeli dárihana barady
QARAǴANDY. QazAqparat - Qaraǵandy oblysynda bıyl shalǵaıdaǵy aýylda turatyn sozylmaly dertke shaldyqqan naýqastardy tegin dári-dármekpen qamtamasyz etý úshin kóshpeli dárihanalardy iske qosý kózdelip otyr, dep habarlaıdy QazAqparat oblys ákiminiń baspasóz qyzmetine silteme jasap.
«Turǵyndar tarapynan sozylmaly dertke shaldyqqan naýqastardy tegin dári-dármekpen qamtamasyz etýge qatysty shaǵym kóp ekeni jasyryn emes. 2017 jyly bizge osy saladaǵy qarjylandyrýdy 5,5 mln teńgege ulǵaıtýǵa múmkindik týdy. Ol óz kezeginde sozylmaly derti bar naýqastardy 100% dári-dármekpen qamtamasyz etýge septigin tıgizdi. Bul problemany sheshý úshin biz emhanalardyń ishinde dárihanalar ashyp, áleýmettik dárihanalar jelisin qurdyq. Bıylǵy jyly shalǵaıdaǵy eldi meken turǵyndaryn dármekpen qamtý úshin kóshpeli dárihanalar qurýdy kózdep otyrmyz», - dedi oblystyq máslıhattyń XVI sessııasynda Densaýlyq saqtaý basqarmasynyń jetekshisi Erjan Nurlybaev.
Onyń aıtýynsha, óńirde emhanalar men aýrýhanalardyń tehnıkalyq jaǵdaıyn jaqsartý jospary jasalǵan. Sońǵy úsh jylda 35 medıtsınalyq mekemede kúrdeli jóndeýden ótkizý úshin 3 mlrd teńgeden astam qarjy bólingen.
2018 jyly 1,5 mlrd teńge 15 ǵımaratty jańǵyrtýǵa jumsalmaq. Barlyǵy oblys boıynsha 77 densaýlyq saqtaý mekemesi jóndeýdi qajet etedi. Bul maqsatqa 7 mlrd teńgeden astam qarjy qajet.
«Qaraǵandy oblysy ákiminiń tapsyrmasy boıynsha densaýlyq saqtaý nysandarynyń jaǵdaıyn jaqsartý boıynsha úsh jyldyq jospar quryldy. Respýblıkalyq bıýdjetten kelgen sýbventsııanyń arqasynda biz úsh jylda barlyq nysandardy qalypqa keltire alatyn bolamyz», - dedi basqarma basshysy.
Buǵan qosa, oblystyq onkologııalyq dıspanserge qajetti jańa jansaqtaý - operatsııalyq bloktyń qurylysyna qatysty másele sheshilip jatyr. Jobalyq-smetalyq qujattama qurylǵan, qujat qazirgi tańda bekitýge jiberildi.
Sondaı-aq, 300 orynǵa shaqtalǵan oblystyq klınıkalyq aýrýhananyń jańa ǵımaratyn salý josparlanyp otyr.
Dárigerler tapshylyǵy máselesi qyzmettik baspana berý jolymen sheshilýde. Páterler Balqash jáne Saran qalasynyń jas mamandaryna berildi. 2019-2020 jyldary 160 medıtsınalyq qyzmetkerlerdi vedomstvolyq baspanamen qamtamasyz etý kózdelip otyr.
