Qaraǵandy oblysynda shahterler kásiporyn basshylyǵynan jalaqyny kóterýdi talap etýde

QARAǴANDY. QazAqparat – Qaraǵandy oblysy Shet aýdany Aqjal kentinde kenshiler birqatar talaptaryn alǵa tartty. Jumysshylar jalaqyny kóterýdi jáne kásiporyndaǵy eńbek jaǵdaılaryn jaqsartýdy talap etip otyr, dep habarlaıdy QazAqparat tilshisi.

«Nova Tsınk» JShS qyzmetkerleri jalaqyny 50%-ǵa arttyrýdy talap etýde. Kenshilerdiń aıtýynsha, olardyń jalaqysy birneshe jyldan beri kóterilmegen jáne qazir olardyń oryndap jatqan eńbek kólemine sáıkes kelmeıdi.

Sondaı-aq qyzmetkerler aýtsorsıngtik kompanııalardyń jumystaryn (túrli qyzmetter, Jóndeý jumystary) «Nova-Tsınk» JShS qyzmetkerlerine tapsyrýdy talap etedi.

Belgili bolǵandaı, mundaı ereýilder buryn jeke tsehtarda bolǵan. Ótken jyly da jalaqyny kóterý týraly áńgimeler júrgizilgen, alaıda bári sóz júzinde ǵana qalǵan.

«Nátıje joq eshqandaı. Jarty jyl ishinde bizge qalypty eńbek jaǵdaılary men jalaqyny kóteremiz dep ýáde etildi. Qazir barlyq qyzmetkerler ereýilge shyqty. Biz jalaqyny 50% - ǵa arttyrýyn talap etemiz. Bizdiń jumys jaǵdaıymyz óte aýyr», - deıdi ereýilshiler.

Oqıǵa ornyna Shet aýdany ákiminiń m.a. Dáýren Karsembaev pen aýdan prokýrory Eldos Jappar keldi. Bul oqıǵa týraly oblys basshylyǵy da habardar.

«Kelissózder qorytyndysyna saı uıymdastyrýshylyq máseleler boıynsha ýaǵdalastyqqa qol jetkizildi, qalǵan máseleler 3 tamyzǵa deıin sheshiletin bolady. Qazirgi ýaqytta kásiporyn qyzmetkerleri ózderiniń jumys oryndaryna shyǵyp, óz mindetterine kiristi», - dep habarlady Qaraǵandy oblysy ákiminiń baspasóz qyzmeti.