Qaraǵandy oblysynda segiz stantsııa jańa jylytý maýsymyna daıyndalyp jatyr
QARAǴANDY. QazAqparat – Qaraǵandy óńiriniń segiz stantsııasy qazandyqtar, týrbınalar men qosalqy jabdyqtardy jóndeýge kiristi. Jańa jylytý maýsymyna daıyndyq kezinde ótken qysta problemalar týyndaǵan nysandarǵa erekshe nazar aýdarylady, dep habarlaıdy QazAqparat tilshisi.
Solardyń biri – Qaraǵandydaǵy № 2 «Bilim-Innovatsııa» lıtseı-ınternaty. Oqý ornynda jylytý máselesi gazdandyrý esebinen sheshiletin bolady. Kúzge qaraı jeliler tartylady, jylytý turaqty jáne únemdi bolady. Sondaı-aq, maýsym aıynda lıtseıge kúrdeli jóndeý bastalady.
Óńir basshysy Jeńis Qasymbektiń tóraǵalyǵymen ótken oblys ákimdiginiń otyrysynda ótken jylytý maýsymynyń qorytyndysy men aldaǵy jospar talqylandy.
«Oblystyń segiz stantsııasynda kestege sáıkes 17 qazandyq pen toǵyz týrbınany kúrdeli jóndeý, eki qazandyqty keńeıtilgen-aǵymdaǵy jóndeý jáne 30 qazandyq pen 22 týrbınany aǵymdaǵy jóndeý josparlanǵan. 2021 jyldan bastap Jezqazǵan JEO-da bir qazandyq pen Topar GRES-inde týrbına aýystyrylýda», - dep habarlady oblystyq energetıka jáne TKSh basqarmasynyń basshysy Ulantaı Úsenov.
Árbir jylý kózi boıynsha búgingi kúni jóndeý jumystarynyń naqty jospary bar jáne naqty merzimderi jazylǵan.
Kesteden aýytqymaı, Temirtaý qalasynda JEO-2-de jetinshi qazandyqtyń qurylysy júrgizilýde. Stantsııaǵa jabdyqtardyń 95% jetkizildi. Jańa qazandyqtyń iske qosylýy qalanyń ystyq sýmen jabdyqtalýyn jaqsartýǵa jáne atmosferanyń lastanýyn aıtarlyqtaı azaıtýǵa múmkindik beredi. Qazandyqty tapsyrý merzimi – 2023 jylǵy qyrkúıekke kózdelip otyr.
Óńirdi odan ári gazdandyrý boıynsha josparlar týraly da aıtyldy. Búgingi tańda Qaraǵandy, Temirtaý jáne Jezqazǵannyń 2 705 jeke turǵyn úıine gaz taratý jelileri tartyldy. 2023 jyldyń basynda bul qalalarda úsh iske qosý kesheniniń qurylysy aıaqtalýy tıis.
Saran qalasynda jetkizýshi gaz qubyryn salý jalǵasady. Jańaarqa aýdanynyń Atasý kentinde, Osakarovka jáne Shahtınsk qalalarynda gazben jabdyqtaý jelileriniń qurylysyna sharttar jasaldy. Buqar Jyraý jáne Shet aýdandaryn, Jáırem kentin gazdandyrýǵa JSQ ázirlenýde.
Qaraǵandyda jylý oqshaýlaǵysh jeliler boıynsha jumys jalǵasady. Joba úlken, birneshe jylǵa eseptelgen.
Ótken jyly Shahan kentinde ortalyqtandyrylǵan qazandyq jáne Balqash JEO-nan Qońyrat shaǵyn aýdanyna deıin magıstraldy jylý jelisi iske qosyldy. 2022 jyly turǵyn úıler men áleýmettik nysandardy ortalyq jylýmen jabdyqtaýǵa kezeń-kezeńmen qosý jalǵasady.
«Bul jylý berý maýsymy turaqty ótti. Endi josparlanǵan barlyq jóndeýlerdi ýaqtyly oryndaý mańyzdy. Jumys barysyn aı saıyn baqylaıtyn bolamyz», - dedi Jeńis Qasymbek.
Oblys ákimi vedomstvo basshylaryna jáne qalalar men aýdandardyń ákimderine birqatar tapsyrmalar berdi.
