Qaraǵandy oblysynda saılaýǵa daıyndyq máselesi pysyqtaldy
QARAǴANDY. QazAqparat – Qaraǵandy oblysynda 10 qańtarda Parlament Májilisi men máslıhattar saılaýyn ótkizý úshin 778 saılaý ýchaskesi uıymdastyryldy, dep habarlaıdy QazAqparat tilshisi.
Qazirgi elektoraldy kezeń kúrdeli jaǵdaıda ótýde. Epıdemıologııalyq qaýipsizdik talaptary respýblıkanyń bas sanıtarlyq dárigeriniń qaýlysymen anyqtalǵan.
Qaraǵandy oblysyndaǵy saılaý komıssııalarynyń daıyndyǵy jáne sanıtarlyq is-sharalardy qamtamasyz etý aımaq basshysy Jeńis Qasymbektiń tóraǵalyǵymen ótken keńeste talqylandy.
Oblystyq saılaý komıssııasynyń tóraǵasy Erqara Aımaǵambetov saılaý komıssııalarynyń bes myńnan astam múshesi oqýdan ótkenin habarlady. Saılaýshylar tizimin naqtylaý boıynsha jumystar júrgizilýde.
Oblystyq saılaý komıssııasy basshysynyń aqparaty boıynsha, óńirde EQYU/DIAQB-dan uzaq merzimdi baıqaýshylar jumys isteýde. TMD, MPA, ShYU jáne basqa da halyqaralyq uıymdardan baıqaýshylar kelýi yqtımal. Saıası partııalardan 2 964 senimdi tulǵa tirkelgen.
Oblystyń bas sanıtarlyq dárigeri - sanıtarlyq-epıdemıologııalyq baqylaý departamenti basshysynyń orynbasary ıÝrıı Zalygın epıdemıologııalyq qaýipsizdik talaptary týraly egjeı-tegjeıli aıtyp berdi.
Maska rejımi, sanıtaızerlerdi paıdalaný, áleýmettik qashyqtyqty saqtaý qajet. Qol ustasýdan aýlaq bolý kerek. Balalardy ózimen birge saılaý ýchaskelerine alyp kelmegen jón.
Ár úsh saǵat saıyn saılaý komıssııasynyń músheleri maskalaryn aýystyryp otyrýy kerek.
Oblysta saılaý komıssııalarynyń múshelerin, baıqaýshylar men senimdi tulǵalardy PTR-testileý bastaldy, respýblıkanyń bas sanıtarlyq dárigeriniń qaýlysyna sáıkes, bul «sary aımaq» óńirlerine qoıylatyn mindetti talap. Qaraǵandy oblysynda olarǵa Shahtınsk, Abaı jáne Osakarov aýdandary jatady. Qalǵandary «jasyl aımaqqa» kiredi.
Barlyq saılaý ýchaskelerinde jeke qorǵaný quraldarynyń qajetti kólemi qamtamasyz etiledi. Úı-jaıǵa kirgen kezde termometrııa júrgiziledi. Temperatýra joǵary bolǵan jaǵdaıda daýys berýge arnalǵan zalǵa kirýge tyıym salynady - bul adamdardy medıtsınalyq tekserý úshin jeke úı-jaıǵa oqshaýlaý qajet. Qajet bolsa, jedel járdem shaqyrylady.
Daýys berý kabınalaryn merzimdi jeldetý jáne dezınfektsııalaý qajet. Saılaýshylarǵa bir rettik qalamdar beriledi.
«Qazirgi saılaý koronavırýstyq pandemııa jaǵdaıynda ótip jatyr. Daýys berý kúnine tórt kún qaldy. Qalǵan kúnderdiń negizgi máselesi - ýchaskelerdi, komıssııalardy daıyndaý, saılaýshylarmen jumysty uıymdastyrý. Sanıtarlyq - epıdemıologııalyq talaptarǵa sáıkes ashyq saılaý ótkizýdi qamtamasyz etý - bizdiń ortaq jumysymyz», - dep atap ótti Jeńis Qasymbek.
