Qaraǵandy oblysynda saýda ortalyqtary men dámhanalar qashan ashylatyny málim boldy
QARAǴANDY. QazAqparat - Qaraǵandy oblysynda saýda ortalyqtary, dámhanalar men meıramhanalar 29 mamyrda ashylady.
Balabaqshalardaǵy kezekshi toptar 1 maýsymda ashylady. Bul týraly Saryarqa telearnasynda tikeleı efır arqyly ótken brıfıngte Qaraǵandy oblysynyń ákimi Jeńis Qasymbek málimdedi, dep habarlaıdy QazAqparat tilshisi.
29 mamyr kúni dámhanalar men meıramhanalar, 30 adamǵa deıingi sııatyn jazǵy terrasalar, qonaq úıler ashylady. Osy kúni saýda oıyn-saýyq ortalyqtary da ashylýy tıis. Alaıda olarda ornalasqan balalar alańdary men kınoteatrlar jabyq bolady.
Sondaı-aq, COVID-19 indetiniń ósimi tómendegende jáne epıdemıologııalyq jaǵdaı turaqtanǵanda maýsymnyń birinshi onkúndiginde Temirtaý qalasy men Botaqara kentin ashý josparlanǵan.
Jeńis Qasymbek karantındik sharalardyń bosańsýyna qaramastan, sanıtarlyq talaptardy qatań saqtaý, qoǵamdyq oryndarda maska kıip, áleýmettik qashyqtyqty saqtaý jáne sanıtaızerlerdi paıdalaný qajettigin atap ótti.
«Karantın – koronavırýstyq ınfektsııanyń aldyn alýdyń birden-bir tıimdi sharasy. Sýyq tııý belgileri kezindegi ózin-ózi oqshaýlaý jáne dárigerdi jedel shaqyrý, maskalardy kııý, kezekte, qoǵamdyq kólikte, serýendeý kezinde áleýmettik qashyqtyqty saqtaý - bul sanıtar dárigerlerdiń talaby ǵana emes, bul órkenıetti qoǵamnyń barlyq músheleri saqtaýy tıis qazirgi zamanǵy etıkettiń jańa erejeleri», - dedi ol.
Sondaı-aq, aımaq basshysy KVI indetiniń ósýi tómendegen jaǵdaıda ǵana karantındik sharalardy odan ári jeńildetýge bolatynyn atap ótti.
