Qaraǵandy oblysynda respýblıkalyq velojarys bastaldy

Saıysqa Qaraǵandy, Almaty, Batys Qazaqstan oblystarynan jáne Nur-Sultan qalasynan 13-14 jastaǵy 130 jasóspirim qatysýda, dep habarlaıdy QazAqparat tilshisi.

Saıystyń ashylý saltanaty Saran qalasynyń bas alańynda ótti.

Jarysqa qala ákimi Erjan Temirhanov, Qaraǵandy oblysynyń dene shynyqtyrý jáne sport basqarmasynyń basshysy Dmıtrıı Karpov jáne jarystyń bas tóreshisi ıÝrıı Kalınchenko qatysty. Olar qatysýshylarǵa sáttilik tiledi.

«Olımpıada úmiti» jarysy - Qazaqstandaǵy 13-14 jastaǵy sportshylar úshin basty doda bolyp tabylady. Jyl saıyn ol Saran qalasynda ótedi jáne jas veloshabandozdar arasynda óte tanymal jarys.

«Men 32 jyl boıy osy velojarysta bas tóreshi bolyp kelemin. Bul saıys óte tanymal, sebebi birinshiden, elimizdiń ortalyǵynda ótedi, munda qaı oblystan bolsyn kelip jetý yńǵaıly. Ekinshiden, munda qatysýshylar úshin jaqsy joldar men jaǵdaı jasalǵan. Úshinshiden, bul jasóspirimder úshin osyndaı iri aýqymdaǵy velojarystardyń biri. Bul jas sportshylar úshin júzden astam qarsylasyńmen jarysqa túsýdiń ne ekenin sezinýdiń alǵashqy múmkindigi. Jas veloshabandozdar kópkúndik velojarystyń ne ekenin, ózin qalaı ustaý kerektigin, qandaı taktıkany tańdaý kerek ekenin túsinýi kerek», - deıdi jarystyń bas tóreshisi ıÝrıı Kalınchenko.

Jarys alty kúnge sozylady. Qatysýshylar 4, 15 jáne 40 shaqyrymǵa toptyq jáne jeke saıysqa túsedi. Jarys qalanyń syrtynda ótedi. Sońǵy kúni «Krıterıým» saıysy ótedi. Ár topta tórt jeńimpaz anyqtalady.  Fınalda eń kóp upaı jınaǵan qatysýshy birinshi oryndy ıelenedi.   

Jarysqa kelgen barlyq sportshylar Saran qalasynda ornalastyryldy.

«Bizdi jaqsy qarsy aldy. Men osynda 19 sportshymen keldim. Olar úshin bul osyndaı aýqymdaǵy alǵashqy jarys», - dedi Nur-Sultan qalasy quramasynyń bapkeri Mıhaıl Kochetkov.

Ár jyldary «Olımpıada úmiti» velojarysyna Aleksandr Vınokýrov, Alekseı Lýtsenko, Andreı Mızýrov, Andreı Kıvılev jáne basqalar qatysqan.