Qaraǵandy oblysynda prokýrorlardyń otstavkasymen aıaqtalǵan qylmystyq is sotqa tústi
QARAǴANDY. QazAqparat - Qaraǵandy oblysy prokýrorynyń birinshi orynbasary Rashıd Dýbaevtiń, prokýratýra basqarmasynyń bastyǵy Almas Ábdaqasovtyń, Temirtaý prokýratýrasynyń basshysy Birjan Sháýlıevtiń otstavkaǵa ketýimen aıaqtalǵan adam urlyǵyna qatysty qylmystyq is boıynsha sot tyńdaýy bastaldy, dep habarlady «QazAqparat» HAA tilshisi.
Qylmystyq ister jónindegi mamandandyrylǵan aýdanaralyq sot aldynda Temirtaýdyń úsh turǵyny jaýap berýde. Tergeý nusqasy boıynsha, olar jergilikti turǵyn Meıram Alpysbaevty urlap áketip, óltirgen. Olardyń biri Alpysbaevpen qas bolǵan. Jábirlenýshi sottalýshyǵa eger aqshany ákelip bermese, jazasyz qalmaıtynyn aıtyp, ses kórsetken. Alaıda sottalýshy ózin oǵan qaryz sanamaǵan.
Nátıjesinde alty jigit Temirtaýda «Sýbarý» kóligimen kele jatqan Alpysbaevty urlap ketip, Astanaǵa qaraı jazyq dalaǵa alyp shyqqan. Olardyń biri Alpysbaevtyń jambasyna sholaq myltyqtan oq atqan. Ony júk salǵyshqa salyp, mashınany jaýyp ketip qalǵan. Alaıda jaraly Alpysbaevtyń kúıin kórý úshin olar qaıta keledi. Olar kelgen bette onyń rýlde otyrǵanyn kóredi. Ol júksalǵyshtan salonǵa shyǵyp, kólikti otaldyrmaq bolǵan. Tergeý nusqasy boıynsha, sol kezde olar Alpysbaevty salonnan alyp shyǵyp, kóliktiń janyna laqtyryp ketken. Al esikti qulyptaǵan. Saldarynan ol kóz jumdy. Alpysbaevtyń múrdesi ekinshi kúni 7 qyrkúıekte tabyldy. Ony ІІD uıymdasqan qylmysqa qarsy kúres basqarmasynyń qyzmetkeri metall urlyǵy boıynsha jedel shara júrgizý barysynda kezdeısoq taýyp alǵan.
Alty fıgýranttyń úsheýi sot aldyna jetkizildi. Qalǵandarynyń birine halyqaralyq izdeý jarııalansa, izdeýde bolǵan ekinshisi asylyp óldi. Úshinshisi Reseıde ustaldy, qazir ol Qazaqstanǵa ekstradıtsııalanýda.
Temirtaý soty Alpysbaevty urlap, onyń ólimine sebep bolǵany úshin Vladımır Morıakovty 4 jarym jylǵa sottaǵan bolatyn. Alaıda sot úkimine kóńili tolmaǵan Alpysbevtyń ákesi Bas prokýrordyń orynbasarynyń qabyldaýynda bolyp, tergeý sapasy óte tómen deńgeıde ótkenin aıtqan. Ol ulynyń ólimine kinálilerdiń deni jazadan qashyp qutylǵanyn jetkizgen. Temirtaýǵa Bas prokýrordyń orynbasarynyń tapsyrmasy boıynsha komıssııa keldi, olar Temirtaý prokýratýrasy istiń basqa fıgýranttaryn qylmystyq qýdalaýdan negizsiz bosatqanyn anyqtady.
Eldiń bas prokýrory Jaqyp Asanovtyń buıryǵymen 2016 jylǵy 10 qazanda oblys prokýrorynyń orynbasary Rashıd Dýbaev, basqarma bastyǵy Almas Ábdaqasov, Temirtaý prokýratýrasynyń basshysy Birjan Sháýlıev laýazymdarynan bosatyldy.
Bul rette, qylmystyq is materıalyna jáne Alpysbaevtyń dosy Shota Djavahıshvılıdiń sotta bergen jaýabyna sáıkes, Alpysbaev óltirilgen kúni Djavahıshvılı onymen birge aýyr qylmys jasaǵan, olar kásipker áıeldi urlap áketken. Qazir 23 jastaǵy Grýzııa týmasy Shota Djavahıshvılı sot aldynda jaýap berýde. Ol kásipkerdi urlap, aqsha bopsalaǵany úshin aıyptalýda. Al Alpysbaevqa qatysty is onyń qaza bolýyna baılanysty toqtatyldy.
