Qaraǵandy oblysynda poıyz ben kólik soqtyǵysyp, eki adam qaza tapty
QARAǴANDY. QazAqparat - Balqash qalasynyń mańynda temirjol ótkelinde júk poıyzy men jol talǵamaıtyn kólik soqtyǵysty. Oqıǵa saldarynan eki er adam qaza tapty, dep habarlaıdy QazAqparat tilshisi.
17 jeltoqsan kúni Balqash qalasynan 37 shaqyrym qashyqtyqta «Balqash-Saıaq» baǵytyndaǵy temirjol tarmaǵynyń shlagbaýmmen jabdyqtalmaǵan ótkelinde Balqash qalasynyń 56 jastaǵy turǵyny júrgizip kele jatqan «Toıota Prado» avtokóligimen «Balqash-Saıaq» baǵytyndaǵy júk poıyzy soqtyǵysty.
Oqıǵa saldarynan «Toıota Prado» avtokóliginiń júrgizýshisi men onyń 33 jastaǵy jolaýshysy alǵan jaraqatynan oqıǵa ornynda kóz jumdy, sondaı-aq atalǵan avtokóliktiń 47 jastaǵy jolaýshysy ártúrli jaraqattarmen medıtsınalyq mekemege jetkizildi.
Atalǵan fakti boıynsha QR QK 345-baby 4-bóligi «Abaısyzda eki jáne odan da kóp adamnyń ólimine ákep soqqan Jol qozǵalysy erejelerin buzý» boıynsha sotqa deıingi tergeý bastaldy.
Tıisti saraptamalar taǵaıyndaldy.
Sotqa deıingi tergeý barysynda istiń barlyq mán-jaıy anyqtalatyn bolady.
