Qaraǵandy oblysynda polıtseıler ózine-ózi qol jumsamaq bolǵan qyzdy qutqaryp qaldy
QARAǴANDY. QazAqparat – Qaraǵandylyq polıtseıler kópirden seirip ketpekshi bolǵan qyzdy ólim aýzynan aman alyp qaldy. Tártip saqshylary ony sońǵy mınýtta qaıǵyly jaǵdaıdan qutqaryp qaldy, dep habarlaıdy QazAqparat tilshisi.
Qaraǵandy oblysy PD patrýldik polıtsııa batalonynyń ekıpajy quramynda vzvod komandıri polıtsııa kapıtany Jumaqas Nurjan, polıtsııa aǵa leıtenanttary Tańatbaev Narıman men Serikbekov Maqsat oblystyq jáne respýblıkalyq mańyzy bar joldardy patrýldedi.
Zarechnyı kentiniń mańynda Shyǵys aınalma jolynda tártip saqshylary jol jıeginde adamdy baıqaǵan. Jaqyndaǵannan keıin olar kópir qorshaýynyń artynda turǵan qyzdy kórgen. Polıtsııa qyzmetkerleri onyń esimin bilip, kómek kerek pe dep suraǵan. Qyz óz esimin aıtyp, ony jalǵyz qaldyrýyn ótingen. Tártip saqshylaryna ol óz-ózine qol jumsaıtynyn aıtqan.
27 jastaǵy aýyl turǵyny bir bótelke syra iship turyp, ekıpajdan ketýin talap etti.
Polıtseılerdiń biri qyzdy áńgimemen alańdatyp jatqanda, ekinshisi aınalyp ótip, bildirtpeı onyń janyna barǵan.
«Qyz mas boldy, onymen baılanys ornatý óte qıyn boldy. Biz ony áńgimege tartýǵa jáne ony qorshaýlardan alystatýǵa tyrystyq. Sońǵy sátte, sekirgen kezinde ony qolynan ustap alyp, joldyń bergi jaǵyna tartyp shyǵardyq», - dep habarlady polıtsııa kapıtany Jumaqas Nurjan.
Polıtsııa qyzmetkerleriniń kásibıliginiń arqasynda ózine-ózi qol jumsaý áreketine jol berilmeı, qyz qutqarylyp, medıtsına qyzmetkerleriniń qolyna tapsyryldy.
