Qaraǵandy oblysynda polıtseıler mingen kólikter soqtyǵysyp, eki adam kóz jumdy
QARAǴANDY. QazAqparat – Qaraǵandy oblysynda eki kóliktiń soqtyǵysýynan jas polıtseı men onyń zaıyby qaza tapty. Taǵy tórt adam túrli jaraqattarmen aýrýhanaǵa jetkizildi, dep habarlaıdy QazAqparat tilshisi.
26 qyrkúıek kúni Qaraǵandy-Jezqazǵan avtojolynda Qulaıǵyr aýylynan 5 shaqyrym jerde 40 jastaǵy er adam tizgindegen «Audi» avtokóligi men 25 jastaǵy er adamnyń basqarýyndaǵy «VAZ» kóligi soqtyǵysqan.
«Jol-kólik apaty saldarynan «VAZ» júrgizýshisi – polıtsııa qyzmetkeri men onyń 21 jastaǵy jolaýshysy kóz jumdy. 22 jastaǵy taǵy bir jolaýshysy medıtsınalyq mekemege jatqyzyldy», - dep habarlady Qaraǵandy oblystyq Polıtsııa departamentiniń baspasóz qyzmetinen.
Keıin anyqtalǵandaı, jaraqat alǵan jolaýshy áıeldiń aıaǵy aýyr. Qazirgi ýaqytta dárigerler onyń jáne sábıdiń ómirin aman alyp qalý úshin kúresýde.
Sondaı-aq, «Audi» ıesi men onyń eki jolaýshysy túrli dene jaraqattaryn alǵan. Olardyń biri oblystyq Polıtsııa departamenti basshysynyń orynbasary. Oqıǵa kezinde joǵary laýazymdy polıtseı demalysta bolǵan.
Atalǵan derek boıynsha QR QK-niń 345-baby 4-bóligi boıynsha sotqa deıingi tergeý júrgizilýde. Tıisti saraptamalar taǵaıyndaldy. Jol apaty sebepteri anyqtalýda.
