Qaraǵandy oblysynda polıtseıdi óltirmek bolǵan aýyl turǵyny ustaldy - ІІD
QARAǴANDY. QazAqparat - Qaraǵandy oblysynda polıtsııa qyzmetkerin óltirýge oqtalǵan Ulytaý aýylynyń 28 jastaǵy turǵyny ustaldy, dep habarlady aımaqtyq ІІD-niń baspasóz qyzmetinen.
«17 aqpanda Ulytaý aýdanynda jergilikti 28 jastaǵy turǵyn polıtsııa qyzmetkerin úıiniń qasynda ańdyp, tegis oqpandy myltyqpen oǵan qaraı eki ret oq atqan. Ýchaskelik ınspektordyń kómekshisi, polıtsııanyń aǵa leıtenanty oqtardan qashyp úlgerdi. Er adamnyń myltyqty qaıtadan oqtaýy sátin paıdalanǵan polıtseı sambo tásilimen ony qarýsyzdandyryp, oqıǵa ornyna tártip saqshylaryn shaqyrdy», - delingen habarlamada.
Ustalǵan er adamdy ýchaskelik ınspektordyń kómekshisi buǵan deıin bılik ókiline baǵynbaý úshin jaýapkershilikke tartqany anyqtaldy. Alkogoldik mas kúıinde bolǵan tártip buzýshy osylaısha polıtseıden kek almaq bolǵan.
«Ustalǵan er adam ýaqytsha oqshaýlaý abaqtysyna qamaldy. Oqıǵa ornynan sholaq myltyq alyndy. QR QK-niń 24-99-babynyń 2-bólimindegi 2-tarmaqshasymen («Adam óltirýge oqtalý») sot aldyndaǵy tergeý amaldary júrgizilip jatyr», - dep aqparattandyrdy vedomstvonyń baspasóz qyzmetinen.
