Qaraǵandy oblysynda pasterellez aýrýyna qatysty karantın bir aıǵa jalǵasady
ASTANA. QazAqparat - Qaraǵandy oblysynda pasterellez boıynsha karantın bir aıǵa sozylady. Bul týraly Úkimet otyrysynan keıin QR Aýyl sharýashylyǵy mınıstrligi Veterınarlyq baqylaý jáne qadaǵalaý komıteti tóraǵasynyń orynbasary Tursyn Qabdoldanov málim etti, dep habarlaıdy QazAqparat.
«Qaraǵandy oblysy boıynsha búginde zerthanalar naqty dıagnozdy qoıdy. Osy oraıda pasterellez aýrýy anyqtalyp otyr. Bul baǵytta tıisti sharalardy jergilikti atqarýshy organdar júrgizip jatyr. Qazirgi kezde 3,5 myńnan astam mal atalǵan indetke qarsy egý jumystarymen qamtyldy. Keshe jergilikti atqarýshy organdar tarapynan tıisti aqparat taratyldy. Barlyǵy 319 bas iri qara mal aýyryp, 96 bas qyryldy»,-dedi Qabdoldanov.
Sonymen qatar ol qalǵan maldardan pasterellez anyqtalmaǵanyn, qazirgi kezde jaǵdaı qalypty ekenin jetkizdi.
Onyń sózine qaraǵanda, kez kelgen aýrý oshaǵy anyqtalǵan kezde eldi mekennen eshqandaı mal ónimderi shyǵarylmaıdy. Búginde bul óńirde pasterellez boıynsha tıisti shekteý qoıylyp, karantın bir aıǵa deıin jalǵasady.
Esterińizge sala keteıik, keshe Aýyl sharýashylyǵy mınıstrliginiń veterınarlyq qadaǵalaý jáne baqylaý komıtetiniń Qaraǵandy oblystyq aýmaqtyq ınspektsııa basshysy Marat Muqtarov aýrý jaıylmaǵanyn aıtqan bolatyn.
Sonymen qatar pasterellezden mal jappaı qyrylyp jatqan Nura aýdanynda TJ rejimi engizilgendigi týraly budan buryn habarlaǵan bolatynbyz.
