Qaraǵandy oblysynda ózgeniń malyn 174 mln teńgege satyp jibergen baqtashylar ustaldy
QARAǴANDY. QazAqparat – Qaraǵandy oblysy Shet aýdanynyń eki turǵyny 174 mıllıon teńgege alaıaqtyq jasady degen kúdikpen ustaldy. Olar ózderine senip tapsyrylǵan jylqylardy satyp jibergen. Atallmysh is boıynsha barlyǵy 50-den astam jábirlenýshi tyńdalyp jatyr, dep habarlaıdy QazAqparat tilshisi.
Baqtashylar 2007 jyldan 2020 jylǵa deıin jylqylardy baǵýmen aınalysqan. Osy ýaqyt ishinde olar 507 bas maldy satyp, aıyrbastap, «joǵaltyp» jibergen. Jylqy ıeleri mal sanynyń jetispeıtinin tek 2020 jyldyń qarasha aıynda bilgen.
«Kúdiktilerdiń ekeýi de Shet aýdanynyń týmalary. Olar jylqylardy baǵýmen aınalysqan. Jylqy ıelerimen jazbasha kelisim bolmaǵan. Aýyzsha kelisim boıynsha
baǵýmen aınalysqan. Adamdar olarǵa jerles bolǵandyqtan sengen. Mal jaıý kezinde álgiler 507 jylqyny satyp jáne aıyrbastap úlgergen. Sonymen qatar, keıbir jylqylardy tirideı, al keıbirin soıyp satqan. Ol jaıly mal ıeleri bilmegen. Birneshe adam bir jylqyǵa ıe bolǵan jaǵdaılar da boldy, sebebi ony baqtashylar birneshe ret almastyryp otyrǵan. Sondaı-aq naqty qansha ret tóldep, qansha qulyn baryn jasyryp kelgen. Mysaly, bıe osy jyldar ishinde 13 ret qulyndasa, baqtashylar bar bolǵany 5 qulyn jaıly ǵana aıtqan», - deıdi Qaraǵandy oblysy PD tergeý basqarmasynyń asa mańyzdy ister jónindegi aǵa tergeýshisi Qanat Saılaýuly.
Shopandardyń alaıaqtyq áreketteri tek 2020 jyldyń qarasha aıynda ashyldy. Soǵym soıý maýsymy aldynda birneshe jábirlenýshi maldaryn ákelýdi suraǵan. Al maldy aıdap alyp kele almaǵan kezde, jylqy ıeleri bul jerde shıkilik baryna kúdiktenip, máseleni anyqtaı bastaǵan. Shyndyqty bilgen bette jábirlenýshiler birinen soń biri jergilikti polıtsııa bólimine ótinish jaza bastaǵan.
«Eger jylqy ıeleri aı saıyn janýarlardyń bar-joǵyn tekserip, olarǵa tańba salyp otyrsa, alaıaqtyqty erterek anyqtaýǵa bolar edi. Adamdar belgili bir jylqysyn alyp kelýdi suraǵanda, olar úıir alysta jaıylyp júrgenin aıtyp syltaýratqan. Keıbireýler tipti jylqylaryn tanymaǵan. Olarǵa baqtashylar basqa jylqyny kórsete salǵan», - deıdi Qanat Saılaýuly.
Qazirgi ýaqytta QR QK 190-babynyń 3-bóligi «Іri kólemdegi alaıaqtyq» boıynsha qylmystyq is qozǵaldy. Eger olardyń kinási tolyǵymen dáleldense, 3 jyldan 7 jylǵa deıin bas bostandyǵynan aıyrylýy múmkin.
«Kúdiktiler kináni ishinara moıyndady. Osy aıdyń sońyna deıin is boıynsha tergeý júrgizý aıaqtalady jáne ol sotqa beriledi», - dep qosty aǵa tergeýshi.
