Qaraǵandy oblysynda Ózbekstannyń 53 azamaty jolda synyp qalǵan avtobýstan qaýipsiz jerge kóshirildi
QARAǴANDY. 11 jeltoqsan. QazAqparat - Qaraǵandy oblysynda jol polıtseıleri jolda synyp qalǵan avtobýstyń ishinde otyrǵan Ózbekstannyń 53 azamatyn qutqardy, dep habarlady oblystyq ІІD-niń jol polıtsııasy basqarmasynan.
Vedomstvonyń aqparatynsha, Ózbekstannyń 53 azamaty jol júrip kele jatqan «Setra» avtobýsy dızeldik apparatýranyń isten shyǵýyna baılanysty saparlaryn jalǵastyra almady. TJ Qaraǵandy qalasynan 90 shaqyrym jerde, «Almaty-Ekaterınbor» tas jolynda oryn aldy.
«Jol polıtsııasynyń ekıpajy jol jıeginde turǵan avtobýsty baıqady. Onyń ishinde 53 jolaýshy otyrdy, sonyń ishinde 1 bala boldy. Olardyń barlyǵy - Ózbekstan azamattary. Avtobýs astanadan Qaraǵandyǵa baǵyttaǵan bolatyn. Barlyq jolaýshylar basqa avtobýsqa otyrǵyzylyp, jaqyn jerdegi kempıngke jetkizildi», - delinedi JPB-nyń habarlamasynda.
Budan basqa, jol polıtseıleri osyǵan uqsas jaǵdaıǵa urynǵan taǵy eki sheteldik azamatqa kómektesti. «Qaraǵandydan 60 shaqyrym jerde jol polıtsııasynyń ekıpajy joldyń shetinde «Mersedes» avtobýsyn baıqady. Onyń turý sebebi - dızeldik otynnyń qatyp qalýy. Júrgizýshiler aqaýlardy ózderi joıa almady. Qyrǵyzstan azamattary bolyp tabylatyn eki júrgizýshi jaqyn jerdegi kempıngke jetkizildi», - dep habarlady JPB-nan.
