Qaraǵandy oblysynda Ózbekstan azamaty 10 keli geroınmen ustaldy
QARAǴANDY. QazAqparat - Qaraǵandy oblysynda qylmystyq transulttyq uıymdasqan qylmystyq topqa qatysy bar degen kúdikke ilingen, ózimen birge 10 keli geroın alyp júrgen Ózbekstan azamaty ustaldy. Bul týraly oblystyq ІІD-nen habarlady.
«12 sáýir kúni esirtki bıznesine qarsy kúres bólimshesiniń qyzmetkerleri arnaıy is-qımyldar barysynda «Almaty-Ekaterınbor» kúre jolynda Ózbekstan Respýblıkasynyń 27 jastaǵy azamaty júrgizgen «Lada-Granta» markaly kólikti toqtatty. Kólikti tekserý barysynda jalpy salmaǵy 10 kelige jýyq esirtki - geroın anyqtaldy», - dedi oblystyq ІІD bastyǵynyń birinshi orynbasary Erlan Omarbekov.
Tergeý nusqasy boıynsha, ustalǵan azamat uzaq ýaqyt boıy Ortalyq Qazaqstan jáne respýblıkanyń soltústik aımaqtaryna «aýǵandyq» geroındi jetkizý jáne satýmen aınalysqan transulttyq uıymdasqan qylmystyq toptyń qatysýshysy bolyp tabylady.
Atalǵan partııany satý jaǵdaıynda esirtki dılerleri shamamen 70 mln teńge paıda tabýy múmkin bolǵany atap ótildi.
«Ustalǵan azamat ýaqytsha ustaý abaqtysyna qamaldy. Onyń sybaılastaryn anyqtaý boıynsha barlyq qajetti tergeý-jedel sharalary ótkizilýde», - dep qosty E.Omarbekov.
Vedomstvonyń aqparatynsha, jyl basynan beri Qaraǵandy oblysynyń polıtseıleri 100 kelige jýyq túrli esirtkilik zattardy, sonyń ishinde 25 kelige jýyq geroındi zańsyz aınalymnan shyǵardy.
