Qaraǵandy oblysynda ótken jylytý maýsymynda turǵyn úı sektorynda 593 órt boldy
QARAǴANDY. QazAqparat – Qaraǵandy oblysynda ótken jylytý maýsymynda turǵyn úı sektorynda 593 órt tirkelgen. Óńir basshylyǵyn alańdatyp otyrǵan bul másele Tótenshe jaǵdaılar jónindegi komıssııa otyrysynda sóz boldy, dep habarlaıdy QazAqparat.
Jıynda óńirde órt qaýipsizdigine baılanysty jaǵdaı jóninde baıandama jasaǵan Qaraǵandy oblysy Tótenshe jaǵdaılar departamentiniń bastyǵy Murat Qatpanovtyń aıtýynsha, aldyn alý jumystaryna qaramastan, jylytý kezeńinde turǵyn úı sektorynda 593 órt tirkeldi.
Qaraǵandy oblysynda turǵyn úıde bolatyn órtterdiń aldyn alý maqsatynda órtke qarsy datchıkter ornatylýda. Órt shyqqan jaǵdaıda belgi beretin mundaı qurylǵynyń osy ýaqytqa deıin 900-ge jýyǵy ornatyldy.
«Turǵyndardyń ystan ýlanýynyń negizgi sebebi aqaýy bar peshti paıdalanýmen baılanysty bolyp otyr. Peshtiń kómegimen jylytylatyn kóp qabatty turǵyn úılerdegi jaǵdaı qazir alańdaýshylyq týdyrady», – dedi Murat Qatpanov.
Osy oraıda kópqabatty úılerdi ortalyq jylýmen jabdyqtaýǵa qosý nemese olardyń janynda avtonomdy qazandyqtardy salý jónindegi jumys oblys ákiminiń erekshe baqylaýynda ekeni aıtyldy.
Qaraǵandy oblysynyń aýmaǵynda 30 órt sóndirý beketi jumys isteıdi. 500-den astam erikti órtke qarsy birlestikter qurylǵan. Sýdaǵy qaýipsizdikti qamtamasyz etý úshin alty qutqarý bólimshesi jumys isteıdi. Sondaı-aq osy sııaqty jasaqtarǵa jumyspen qamtý ortalyqtarynda esepte turǵan adamdar tartylady. Olar arnaıy oqýdan ótip, qoǵamdyq qutqarýshylar retinde áreket etedi.
Oblysta tabıǵı órttermen kúresý úshin is-sharalar jospary bekitilgen. Qazirdiń ózinde alty orman órti jáne 33 dala órti tirkeldi. Olardyń barlyǵy der kezinde joıyldy.
Dala órtterimen kúres baǵytynda oblysta 505 erikti órtke qarsy quralymdar jumys isteıdi. 2020 jyly 22 mobıldi órt sóndirý kesheni, bıyl taǵy 9-y satyp alyndy. Tótenshe jaǵdaılar departamenti 17 birlik qosymsha tehnıka satyp alýdy josparlap otyr.
Óńirde qoǵamdyq birlestikter nysanyndaǵy órtke qarsy erikti quralymdardy tirkeý jalǵasýda. Halyqqa úgit-nasıhat jumystary júrgizilýde.
Orman órtterin erte anyqtaý maqsatynda ǵaryshtyq monıtorıng derekteri paıdalanylady.
Jazǵy maýsymda qutqarýshylardyń taǵy bir mańyzdy baǵyty - sý nysandary. Sýdaǵy qaıǵyly oqıǵalardyń aldyn alý úshin alty qutqarý bólimshesi quryldy. Buǵan 100-den astam adam kiredi. Qutqarýshylardyń qaramaǵynda 23 tehnıka jáne 43 júzý quraldary bar. Sondaı-aq demalys aımaqtary men jaǵajaılardyń ıelerimen túsindirý jumystary júrgiziledi, balalardyń sýda ózderin ustaý erejelerin saqtaý taqyrybynda ata-analar jınalystary ótkiziledi.
«Órtke qarsy is-sharalarǵa, jazǵy kezeńde balalardyń demalýyna jáne sý nysandarynda qaýipsizdikti qamtamasyz etýge baılanysty máselelerdi erekshe baqylaýǵa alýdy suraımyn», – dedi oblys ákimi Jeńis Qasymbek otyrys sońynda.
