Qaraǵandy oblysynda órtten úsh adam qaza tapty
QARAǴANDY. QazAqparat - Qaraǵandy oblysynda ótken táýlikte órtten úsh adam qaza tapty. Bul týraly QR Tótenshe jaǵdaılar mınıstrliginiń resmı ókili Talǵat Ýálı málim etti, dep habarlaıdy QazAqparat.
Atap aıtqanda, 4 jeltoqsan kúni saǵat 12.28-de Abaı qalasynda bes qabatty turǵyn úıdiń tórtinshi qabatyndaǵy páterden órt shyqty. Úı zattary men aǵashtan jasalǵan tereze jaqtaýlary janǵan. Órttiń 5 sharshy metr aýmaqty sharpyǵan. Qutqarýshylar baspaldaq arqyly 2 adamdy evakýatsııalady. Jalyn saǵat 12.45-te tolyq sóndirilgen. Oqıǵa ornynda 58 jastaǵy páter ıesiniń denesi tabyldy. 67 jastaǵy er adam kómirqyshqyl gazyna ýlanyp, aýrýhanaǵa jatqyzyldy.
«Sondaı-aq, 5 jeltoqsanda saǵat 07.34-te Shahtınsk qalasynyń Shahan kentinde bes qabatty turǵyn úıdiń besinshi qabatyndaǵy páterde órt shyqty. 40 sharshy metr aýmaq janǵan. Órt sóndirýshiler kireberisten baspaldaq arqyly 3 adamdy evakýatsııalady. Oqıǵa ornynda 1957 jyly týǵan er adam jáne 1962 jyly týǵan áıel qaza boldy. Qabyldanǵan sharalardyń arqasynda jalyn saǵat 08.45-te sóndirildi. TJD bólimshelerinen 16 adam men 3 tehnıka jumyldyryldy. Aldyn ala boljam boıynsha, órttiń sebebi ashyq ot kózi (sirińke, temeki, sham jáne t.b.). QR TJM barsha azamattardan órt qaýipsizdigin qatań saqtaýǵa shaqyrady», - dedi T.Ýálı.
