Qaraǵandy oblysynda onlaın saýda úsh ese ulǵaıýy múmkin

QARAǴANDY. QazAqparat – Qaraǵandy oblysynda onlaın saýdanyń úlesi úsh esege, ıaǵnı 0,8%-dan 2,4%-ǵa deıin ósýi boljanady, dep habarlaıdy QazAqparat tilshisi.

«Tsıfrlyq Qazaqstan» memlekettik baǵdarlamasy aıasynda elektrondyq saýdany damytý máseleleri onlaın rejıminde ótken apparattyq keńeste talqylandy.

«Resmı málimetterge sáıkes, 2019 jyly oblysta bólshek saýda kólemi 8,1 mlrd teńgeni qurady. Karantın kezeńindegi jaǵdaıdy eskere otyryp, kóptegen saýda úıleri men qoǵamdyq tamaqtandyrý nysandary jabylýyna baılanysty jetkizý boıynsha jumysqa kóshken kezde, 2020 jyldyń qorytyndysy boıynsha bólshek taýar aınalymyndaǵy úlesti 2,4%-ǵa arttyra otyryp, elektrondyq saýdanyń keminde úsh esege ósýi kútilýde», - dedi kásipkerlik basqarmasynyń basshysy Tatıana Ablaeva.

Sondaı-aq, ol 2025 jylǵa qaraı elektrondy saýda úlesin 10%-ǵa jetkizý mindeti qoıylǵanyn jetkizdi.

«2019-2025 jyldarǵa arnalǵan elektrondyq saýdany damytý jónindegi jol kartasy iske asyrylýda. Qujat tutynýshylardy qorǵaý sharalaryn, bıznes úshin preferentsııalardy, qoldaý ınfraqurylymyn qurýdy kózdeıdi», - dep tolyqtyrdy ol.

Sondaı-aq, azamattardy tsıfrlyq saýattylyqqa úıretedi. Karantın jaǵdaıynda kýrstar qashyqtyqtan https://digitalkz.kz/kursy/ saıtynda ótkiziledi.

Qaraǵandy oblysynda https://ba09.kz ınternet-alańy quryldy, onda onlaın-dúkender men qyzmetterge siltemeler usynylǵan.

Jyl basynan beri oblysta qolma-qol aqshasyz tólemder kólemi bes esege ósti. Statıstıkalyq málimetter boıynsha, bes aıda ol 553 mlrd teńgeni qurady.

«Elektrondy saýda kólemi ósip kele jatqanyn kórip otyrmyz. Bul jaqsy kórsetkish. Saýda kóleńkeden shyǵady. Bul úrdisti qoldaý kerek. «Atameken» palatasymen birlesip, bızneske elektrondy alańdardy ıgerýge kómektesý qajet. Halyqtyń sandyq saýattylyǵyn arttyrýymyz tıis», - dedi oblys ákimi Jeńis Qasymbek.