Qaraǵandy oblysynda onkologııalyq naýqastardy endoskopııalyq tásilmen anyqtap, emdeıdi
QARAǴANDY. QazAqparat - Qaraǵandyda endoskopııalyq ortalyq ashyldy. Oblystyq onkologııalyq dıspanser janyndaǵy bólimshede endi qaterli isik erte satysynda anyqtalatyn bolady, dep habarlaıdy QazAqparat tilshisi.
Zamanaýı qural-jabdyqtardyń kómegimen dárigerler qabyný, jalaq jara ózgerýlerin, obyr aldy jaǵdaılardy anyqtap qana qoımaı, sonymen qatar qaterli isikti de endoskop arqyly alyp tastaı alady. Óńir basshysy Jeńis Qasymbek jańa ortalyqta boldy.
Munda bir aýysymda 70-75 skrınıngtik naýqas jáne 35 statsıonarlyq patsıent qabyldanady. Kún saıyn 10-12 az jaraqattyq endokoskopııalyq operatsııalar júrgizý josparlanýda. №3 kópbeıindi aýrýhana janyndaǵy ortalyqta joǵary bilikti mamandar eńbek etedi.
«Biz úshin endoskopııalyq ortalyq – aýrýshańdyqtyń joǵary bolýyna baılanysty birinshi kezektegi qajettilik. Bizdiń dárigerler arnaıy oqýdan ótti», - dedi oblystyq onkologııalyq dıspanserdiń dırektory Muratbek Jumaqaev.
Ortalyq eń joǵary tehnologııalyq jabdyqtarmen jabdyqtalǵan. Munda japondyq Olympus kompanııasynyń saraptamalyq klastaǵy medıtsınalyq apparattary ornatylǵan. Olar barlyq álemdik talaptar men standarttarǵa sáıkes keledi. Óz betinshe júrip-turýǵa qaýqarsyz naýqastarǵa arnalǵan arnaıy kótergish qurylǵysy bar.
Anestezııamen júrgizilgen endoskopııalyq protsedýralardan keıin patsıentterdi oıatý bólmesi bar. Medıtsınalyq qyzmet kórsetý sapasyn jyljymaly tsıfrlyq rentgen-qondyrǵy, jerishilik ÝDZ-dıagnostıkaǵa arnalǵan zamanaýı apparat jáne narkozdy-tynys alý apparaty aıtarlyqtaı arttyrady.
Kabınetter medıtsınalyq gazdardy berýge arnalǵan qabyrǵalyq konsoldermen, sondaı-aq beıne - jáne fotofıksatsııa fýnktsııasy bar gastrodýodenoskopııalardy, bronho-jáne kolonoskopııalardy júrgizýge arnalǵan beıneendoskopııalyq tirektermen jabdyqtalǵan. Bólimshede sondaı-aq endoskoptardy dezınfektsııalaý jáne sterıldeýdiń joǵary deńgeıin qamtamasyz etetin jýý bólmesi qarastyrylǵan.
Qaraǵandy oblysy qaterli isik aýrýlarynyń sany boıynsha elimizde tórtinshi orynda tur. Bul óńirde onkologııalyq naýqastardyń joǵary paıyzy skrınıngtik zertteýler barysynda erte satylarda anyqtalatyndyǵyna baılanysty.
Kelesi jyly Jezqazǵanda onkologııalyq dıspanser fılıalynyń qurylysyn bastaý josparlanýda.
