Qaraǵandy oblysynda ónim shyǵarý kólemi 4 paıyzǵa ósti

QARAǴANDY. QazAqparat - Qaraǵandy óńiri halqynyń úshten biri shaǵyn jáne orta bıznes salasynda jumys isteıdi. Jyl basynan beri jumys istep turǵan kásipkerlik sýbektileriniń sany 89 078 birlikti qurady, dep habarlaıdy QazAqparat.

Shaǵyn jáne orta bıznestegi saýda jáne qyzmet kórsetý salalary pandemııaǵa baılanysty qıyn jaǵdaıǵa tap boldy. Prezıdenttiń tapsyrmasy boıynsha 2,8 myń kásipkerge qarjylyq qoldaý kórsetildi, 2,3 myń adam bıznes júrgizý egizderine oqytyldy. Memlekettik qoldaýdyń arqasynda oblystyń ShOB-i ónim shyǵarý kórsetkishiniń 4%-ǵa ósýin qamtamasyz etti, 2 200 turaqty jumys orny quryldy. Bul týraly Qaraǵandy oblysynyń ákimi Jeńis Qasymbek OKQ brıfınginde málimdedi.

«Jalpy bıyl Qaraǵandy oblysynda barlyq memlekettik baǵdarlamalar aıasynda 33 myńnan astam jańa jumys orny ashylady», - dep atap ótti oblys ákimi.

Qazirgi jaǵdaıǵa beıimdele otyryp, kóptegen kásipkerler onlaın-saýda men jetkizilimge kóshti. Jyl qorytyndysy boıynsha elektrondyq saýdanyń kem degende 3 ese ósýi kútilýde.

Eńbek naryǵyndaǵy jaǵdaıdy turaqtandyrý úshin memlekettik baǵdarlamalardyń barlyq áleýeti paıdalanylady. Jyl basynan beri Jumyspen qamtý organdaryna 41 myńnan astam adam júgindi, olardyń 35 myńnan astamy jumysqa ornalastyryldy, al «Jumyspen qamtýdyń jol kartasy» baǵdarlamasyn iske asyrý 140 eldi mekende ınfraqurylymnyń damýyna serpin berdi. Infraqurylymdyq jobalarda 16 myń jumys orny quryldy.