Qaraǵandy oblysynda ónerkásiptik qaldyqtardy dalaǵa tókken fabrıkaǵa tekserý júrgizilýde
Energetıka mınıstrliginen habarlaǵandaı, 2019 jyldyń 10 sáýirinde «Terekti taý-ken baıytý kombınaty» baıytý fabrıkasynyń ónerkásiptik qaldyqtarynyń Aıyr aýyly mańynda jer betine tógilýi faktisi tekserile bastaǵan. Qarqaraly aýdany ákiminiń ótinishi boıynsha Qaraǵandy oblysy boıynsha ekologııa departamentiniń mamandary «Qazgıdromet» RMK-men birlesip sol jerge baryp, tógilgen sýdyń synamasyn aldy.
«Qaraǵandy oblysy boıynsha ekologııa departamenti «Altaı Polımetally» JShS-ǵa qatysty ónerkásiptik aǵyndardy tógý faktisi boıynsha jospardan tys tekserý júrgizýde. Atalǵan kombınat qyzmetiniń negizgi túri - Qarqaraly aýdanynda ornalasqan «Kóktasjal» ken ornyn ıgerý bolyp tabylady. Mys ken orny Terekti aýylynan 8 shaqyrym jerde ornalasqan. «Altaı Polımetally» JShS aqparaty boıynsha buzýshylyqtardy joıý boıynsha is-sharalar júrgizilýde», - dep habarlaıdy Energetıka mınıstrliginiń baspasóz qyzmetinen.
«Altaı Polımetally» JShS-nyń sý tógý faktisi boıynsha tıisti sharalar qabyldaý úshin múddeli memlekettik organdarǵa (Qaraǵandy oblysynyń Qoǵamdyq densaýlyq saqtaý departamenti, Qaraǵandy oblysynyń Tótenshe jaǵdaılar departamenti, Nura-Sarysý basseındik ınspektsııasy, Tabıǵı resýrstar jáne tabıǵatty paıdalanýdy retteý basqarmasy) hattar jiberildi. Energetıka mınıstrligi tekserý nátıjeleri týraly aqparatty aldaǵy ýaqytta qosymsha habarlamaq.
