Qaraǵandy oblysynda óndiristegi qaıǵyly oqıǵalar sany azaıdy
ASTANA. QazAqparat - Qaraǵandy oblysynyń baılanys qyzmetinde ótken kezekti brıfıng eńbek quqyqtaryn qorǵaý máselesine arnaldy. Kásiporyndardaǵy tekserister týraly oblystyń Eńbek ınspektsııasy basqarmasy basshysynyń mindetin atqarýshy Qanatbek Balsarıev baıandap berdi.
«Memlekettik eńbek ınspektorlarymen 2017-shi jyldyń 9 aı aralyǵynda 1015 uıym tekserilgen. 712 ereje buzý faktileri tirkelgen, onyń ishinde 631 - eńbek qatynasy boıynsha bolsa, 74 - eńbek qaýipsizdigi men qorǵaý boıynsha, 7 - halyqty jumyspen qamtýǵa baılanysty bolǵan. Tekserister qorytyndysy boıynsha 346 buıryq jazyldy», - dep málimdedi spıker.
Eńbek qaýipsizdigin baqylaý mańyzdy baǵyt bolyp tabylady, dep atap ótti ol.
«Qaraǵandy oblysynda eń kóp jazataıym oqıǵalar oryn alatyn kásiporyndar - ol «Qazaqmys», «ArselorMıttal Temirtaý» korporatsııalary, sondaı-aq bıýdjettik uıymdar. Mysaly, jedel járdem feldsherleri, deneshynyqtyrý muǵalimderi zardap shegedi», - dedi Qanatbek Balsarıev.
Degenmen, ótken jylmen salystyrǵanda jumys oryndaryndaǵy qaıǵyly oqıǵalar sany azaıǵany baıqalady.
Eńbek ınspektsııasynyń málimetinshe, 2017-shi jyldyń 9 aı aralyǵynda kásiporyndardaǵy jazataıym oqıǵalar sany 123, ótken jylǵy sáıkesinshe merzimde bul kórsetkish 132 bolǵan. Ol oqıǵalarda 140 adam zardap shegip, onyń 25-i kóz jumǵan. Ótken jyly 151 adam zardap shegip, 29 ólim tirkelgen.
Oblysymyzdyń kásiporyndary men uıymdarynda 3500-nan astam ujymdyq kelisimsharttar ornatylǵan.
Jyl basynan beri áleýmettik seriktestik boıynsha Oblystyq úsh jaqtyq komıssııanyń úsh otyrysy ótken. Onyń taldaýyna 11 másele salyndy, onyń 7-ýi eńbek qarym-qatynasyn retteýge baılanysty boldy.
