Qaraǵandy oblysynda «Ońaltý túrmesi» pılottyq jobasy júzege asyrylýda
ASTANA. QazAqparat - Qaraǵandy oblysynda «Ońaltý túrmesi» respýblıkalyq pılottyq jobasyn júzege asyrylýda. Ol bas bostandyǵynan aıyrylǵandardy qoǵamǵa qaıta beıimdeý baǵytynda memlekettik organdar men úkimettik emes sektordyń jumysyn birikteredi, dep habarlaıdy QazAqparat Qaraǵandy oblysy ákimdigine silteme jasap.
Jobany bastaý jáne júzege asyrý máseleleri Qaraǵandy oblysy ákimdiginiń janyndaǵy konsýltatıvtik-keńestik organnyń otyrysynda talqylandy.
Qaraǵandy oblysynyń ákimdigi taratqan málimetterge qaraǵanda, Qazaqstanda Ult josparyn júzege asyrý sheńberinde 2017-2019 jyldarǵy probatsııa qyzmetinde esepte turǵan jáne jazasyn ótep shyqqan azamattardy áleýmettik ońaltý Keshendik strategııasy bekitilgen.
«Sottalǵandardy qaıta beıimdeý - ózekti mindetterdiń biri. Ony sheshý tek quqyq qorǵaý organdryna ǵana emes, birinshi kezekte jergilikti atqarýshy jáne basqa da ortalyq memlekettik organdarǵa, sonymen qatar azamattyq qoǵam ınstıtýttaryna da táýeldi», - deıdi QR ІІM Qylmystyq-atqarý júıesi komıteti tóraǵasynyń orynbasary Meıram Aıýbaev.
Onyń aıtýysha, bas bostandyǵynan aıyrylǵandardy áleýmettik beıimdeýde damyǵan elderdiń tájirıbesi qoldanylady. Bostandyqqa shyqqan soń baspana, jumysqa ornalastyrý, týǵan-týystarmen baılanysty qaıta jandandyrý sııaqty máseleler boıynsha alǵashqy kómek kórsetý óte mańyzdy:
«Halyqaralyq tájirıbeni eskere kele «Ońaltý túrmesi» pılottyq jobasy júzege asyrylady. Ol bostandyqqa shyǵatyn azamatqa eńbek, turmystyq jáne basqa da máseleler boıynsha keshendi kómek kórsetýdi qarastyrady. Ol úshin Іshki ister mınıstriniń jarlyǵymen vedomstvoaralyq jumys toby qurylǵan», - dep málimdedi Meıram Aıýbaev.
Jobaǵa Eýropalyq Odaq qoldaý kórsetedi. Jobany júzege asyrý úshin halyqaralyq sarapshy shaqyrtyldy.
Іlki joba retinde Qaraǵandy oblysynyń eki mekemesi tańdalǵan: Qarabastaǵy AK-159/18 jáne Dolınkadaǵy AK-159/20.
«Qaraǵandy oblysynyń tańdap alynýy beker emes. Oǵan Qylmystyq atqarý júıesi departamentiniń, jergilikti atqarý organdarynyń, sondaı-aq úkimettik emes sektordyń birlese atqarǵan nátıjeli jumysy túrtki boldy. Oblys ákimimen Keshendik strategııany júzege asyrý boıynsha sharalar josparyn atqarý boıynsha jelilik keste quryldy», - dep atap ótti QAJK tóraǵasynyń orynbasary.
2018-shi jyldyń sáýirine deıin joba Qaraǵandy oblysynda aprobatsııadan ótedi dep josparlanyp otyr. Sonan soń tájirıbe respýblıkaǵa taralady. Qylmystyq atqarý júıesi taratqan málimetter boıynsha 2017-shi jyldyń 10 aıynda túzeý mekemelerinen 614 adam bostandyqqa shyqqan, olar oblysymyzdyń túrli qalalary men aýdandaryna kóship ketken.
«2017-shi jyldyń 1-shi qarashasyna deıin temir tordyń arǵy jaǵynan shyqqan jáne probatsııa qyzmetinde jumysqa turý úshin esepte turǵandar sany 530 adamdy quraǵan, olardyń 276-y jumysqa ornalastyryldy, onyń ishinde 49 - áleýmettik, 51 - qoǵamdyq jumystarǵa. 52 adam qysqa merzimdi kýrstarǵa jiberilgen», - dep málimdedi oblystyq Jumyspen qamtýdy úılestirý jáne áleýmettik baǵdarlamalar basqarmasy jetekshisiniń mindetin atqarýshy Maksım Galıýllın.
Qazirgi tańda osy sanattaǵy azamattarǵa 2018-shi jylǵa arnalǵan jumys oryndarynyń kvotalary qurylýda.
Qaraǵandy oblysynda taǵdyr tálkegine túsken azamattarǵa arnalǵan úsh ońaltý ortalyqtary qyzmet etedi - Qaraǵandyda, Temirtaýda jáne Jezqazǵanda. Basqarma aqparatyna súıener bolsaq, bıylǵy jyly onda qamaýdan shyqqan 69 adam pana tapqan.
