Qaraǵandy oblysynda oqýshysy 300-den aspaıtyn mektepter dástúrli formatta oqytady

QARAǴANDY. QazAqparat - Qaraǵandy oblysynda oqýshylar sany 300-den aspaıtyn qalalyq jáne aýyldyq mektepter dástúrli bilim berý formatyna aýysady. Bul rette, ár synypta 25 oqýshydan aspaýy tıis, dep habarlaıdy QazAqparat tilshisi.

QR Bas memlekettik sanıtarııa dárigeriniń 2021 jylǵy 25 naýryzdaǵy №12 qaýlysynyń kúshine enýine baılanysty Qaraǵandy oblysynyń bas memlekettik sanıtarııalyq dárigeriniń qoldanystaǵy 2021 jylǵy 19 qańtardaǵy № 2-Q qaýlysyna ózgerister men tolyqtyrýlar engizý týraly sheshim qabyldandy, atap aıtqanda:

- 2020-2021 oqý jylynyń tórtinshi toqsanynan bastap oqýshylar sany 300-ge deıin, synyptardaǵy balalar sany 25 adamnan aspaıtyn qalalyq jáne aýyldyq mektepterde dástúrli formatta oqytý qaıta bastalady;

- bilim berý uıymy ákimshiliginiń sheshimi boıynsha sabaqtan tys ýaqytta 15 adamnan aspaıtyn toptarda oqýshylardy jeke oqytý júrgiziledi;

- táýekeli tómen jáne ortasha aımaqtarda (jasyl jáne sary aımaqtar) ornalasqan óńirlerde oqytý synyptardaǵy balalar sany 25 adamnan aspaıtyn barlyq synyp oqýshylary úshin jalpy bilim beretin mektepterde aralas formatta júrgiziledi;

- joǵary qaýipti aımaqta (qyzyl aımaq) ornalasqan óńirlerde oqytý mektepaldy synyptardyń oqýshylary úshin jalpy bilim beretin mektepterde 1-den 5-synyptardy qosa alǵanda, halyqaralyq mektepterde 1-den 7-synyptardy qosa alǵanda, synyptardaǵy balalar sany 25 adamnan aspaıtyn aralas formatta júrgiziledi;

- bitirýshi synyptar úshin (9, 11 (12) synyptar) aptanyń 6 kúni ishinde aralas formatta oqytý: pánderdiń 70% – y shtattyq rejımde, 30%-y qashyqtan (synypta 15 adamnan artyq emes, «1-synyp-1-kabınet» qaǵıdaty boıynsha oqytý, sanıtarııa-dezınfektsııa jáne maska rejımderin saqtaý) júrgiziledi.

Qujat qol qoıylǵan kezinen bastap kúshine enedi.