Qaraǵandy oblysynda oqýshyny zorlady degen kúdikpen 40 jastaǵy turǵyn ustaldy
QARAǴANDY. QazAqparat – Qaraǵandy oblysynyń kentteriniń birinde mektep oqýshysyn zorlady degen kúdikpen ózin ımam retinde tanystyryp júrgen er adam ustaldy, dep habarlaıdy QazAqparat tilshisi.
2020 jyldyń 31 jeltoqsanynda Qaraǵandy oblysynyń polıtsııa departamentine jergilikti bloger Aısultan Jaqypov habarlasqan.
Ol «Maǵan Qaraǵandy oblysynyń bir aýdanynyń turǵynynan kámeletke tolmaǵan bala júkti bolǵany týraly aqparat kelip tústi. Onyń ústine, onyń ata-anasy bul faktini jasyratyny belgili boldy» dep málimdegen.
Sol kúni atalǵan habarlama boıynsha QR QK 120-baby 4-bóligi boıynsha dereý qylmystyq is tirkeldi.
Oblystyń PD tájirıbeli qyzmetkerlerinen jedel-tergeý toby quryldy.
Olar qysqa merzimde eldi mekendi jáne oqıǵanyń barlyq qatysýshylaryn anyqtady.
«Aldyn ala tergeý barysynda atalǵan derek rastaldy. Polıtsııa qyzmetkerleri kúdiktini – oblystyń 40 jastaǵy turǵynyn anyqtap, ustady. Sot oǵan qatysty «qamaýǵa alý» bultartpaý sharasyn tańdady. QR QІJK 201-babyna sáıkes ózge aqparat jarııalanbaıdy», - dep habarlady Qaraǵandy oblysy PD baspasóz qyzmeti.
Musylmandar dinı basqarmasy er adam dinı mektepte oqyǵanyn, biraq ımam sertıfıkatyn almaǵanyn málimdedi.
Alaıda, aýyl turǵyndary osy kúnge sheıin oǵan dinı rásimder ótkizýin surap, júginip júrgen.
