Qaraǵandy oblysynda oqýshylarǵa arnalǵan Mansap qurý ortalyǵy ashyldy
SÁTBAEV. QazAqparat - Qaraǵandy oblysynyń Sátbaev qalasynda «Mektep oqýshylaryna arnalǵan Mansap qurý ortalyǵy» kásibı baǵdarlaý jobasy iske asyrylyp jatyr, dep habarlaıdy QazAqparat oblys ákimdiginiń saıtyna silteme jasap.
Ortalyqqa EDTECH halyqaralyq bilim ortalyǵy seriktes boldy. Ortalyq joǵary synyp oqýshylaryna bolashaq mamandyqty tańdaýdy anyqtaýǵa kómektesedi.
Oblys ákimi Jeńis Qasymbek barlyq qalalar men aýdandarda osyndaı ortalyqtar qurýdy tapsyrdy.
«Elimizdiń Prezıdenti Qasym-Jomart Toqaev Qazaqstan halqyna Joldaýynda mektep oqýshylarynyń qabiletin anyqtaý jáne kásibı baǵdarlaý saıasatyna ótý qajettiligin erekshe atap ótti. Osy mindetterdi iske asyrý úshin biz EDTECH halyqaralyq bilim ortalyǵynyń baǵdarlamasy boıynsha mektepterde kásibı baǵdarlaý júıesin ózgertýge kiristik. Baǵdarlama negizinde joǵary synyp oqýshylary úshin otandyq KASIP tsıfrlyq keshendik kásibı baǵdarlaý júıesi jatyr. Ol tulǵa erekshelikteri men eńbek naryǵyndaǵy áleýmettik-ekonomıkalyq jaǵdaılardy eskere otyryp jastardy mamandyq tańdaýǵa daıyndaýǵa baǵyttalǵan», - dedi Sátbaev qalasynyń ákimi Asqar Ydyrysov onlaın rejımde ótken tamyz konferentsııasynda.
Qalada Kásibı baǵdarlaý boıynsha úılestirý keńesi quryldy. Ony Asqar Ydyrysov basqarady, quramyna Kásipkerler palatasynyń qalalyq fılıalynyń, «Qazaqmys» korporatsııasynyń Jumyspen qamtý ortalyǵynyń, «Jastar» jastar resýrstyq ortalyǵynyń, JOO-nyń, kolledjderdiń ókilderi kirdi.
Mansap qurý ortalyǵy Mektep oqýshylary saraıynda ashyldy. Mektep bitirýshiler men joǵary synyp oqýshylaryn kásibı dıagnostıkalaý úshin eki testileý ótkizildi. Ákimniń aıtýynsha, nátıjeler tehnıkalyq mamandyqtarǵa joǵary qyzyǵýshylyqty kórsetken.
Qaraǵandy oblysynyń SANA skills pılottyq jobasyna qatysýy týraly SANA Ǵylymı-praktıkalyq psıhologııa ortalyǵynyń dırektory Altynaı Ábdrahmanova baıandady. Tómengi synyp oqýshylaryna arnalǵan arnaıy baǵdarlamany synamalaý eki astanalyq jáne bes qaraǵandylyq mektepte ótedi.
«Bul jyly Six Seconds halyqaralyq kompanııasymen áriptestikte pılottyq joba qatysýshylarynyń áleýmettik-emotsıonaldy klımatyn zertteý ótkizildi. Saýal alýǵa 630 suhbatker qatysty. Nátıjeler balalar men pedagogtar tarapynan baǵdarlamaǵa úlken qyzyǵýshylyqty kórsetti», - dedá ortalyq basshysy.
Onyń pikirinshe, ata-analardyń rólin arttyrý kerek. Bul úshin trenıngjáne semınar uıymdastyrylady.
Óńir basshysy eki jobany da maquldady jáne jumysty jalǵastyrýdy tapsyrdy.
«Bizge oqýshylardy mamandyqty sanaly, óz betimen tańdaýyna, olarda kásibı ózin-ózi anyqtaýǵa psıhologııalyq daıyndyqty qalyptastyrýymyz qajet. Bul tek qoǵamǵa emes, eń aldymen jas adamnyń ózine kerek. «Mektep oqýshylaryna arnalǵan mansap qurý ortalyǵy» jobasyn iske asyrý tájirıbesi oblystyń barlyq óńirlerine kórsetilýi qajet», - dep atap ótti Jeńis Qasymbek.
Ol kásibı baǵdarlaý boıynsha oblystyq úılestirý keńesin qurýdy usyndy.
