Qaraǵandy oblysynda oqýshylar sany 5 myńǵa kóbeıdi
QARAǴANDY. QazAqparat – Qaraǵandy oblysynda 209 myń oqýshy úshin jańa oqý jyly dástúrli formatta bastalady. Ótken jylmen salystyrǵanda olardyń sany 5 myńǵa artty. 1 qyrkúıekte 20 800 birinshi synyp oqýshysy alǵash ret partaǵa otyrady, dep habarlaıdy QazAqparat tilshisi.
Oblys ákiminiń orynbasary Abzal Núkenovtiń tóraǵalyǵymen ótken Kámeletke
tolmaǵandardyń isteri jáne olardyń quqyqtaryn qorǵaý jónindegi turaqty oblystyq komıssııa otyrysynda jańa oqý jylyna daıyndyq máseleleri talqylandy. Kezdesý onlaın rejımde ótti.
Óńirde 489 qalalyq jáne aýyldyq mektep jumys isteıdi.
Komıssııa otyrysynda shaǵyn jınaqty mektepterdiń jumys isteýine qatysty másele qozǵaldy. Keıbir aýyldyq mektepterde balalardyń jetispeýshiligi baıqalady. Mektepterde 5-10 baladan oqıtyn aýdandar bar. Bilim berý sapasy týraly másele týyndady, sondyqtan birqatar obektıvti sebepterge baılanysty keıbir mektepter qaıta quryldy. Basty negiz - QR Bilim jáne ǵylym mınıstrligi belgilegen balalar sany boıynsha normatıvterge sáıkes kelmeý.
Mektepter jabylǵan árbir eldi meken boıynsha balalardyń oqýyn qaıda jalǵastyratyny týraly másele sheshildi. Olardy jaqyn mańdaǵy basqa aýylǵa jáne qaıtadan úıge alyp baratyn bolady, bir bóligin ınternattarǵa ornalastyrady, dep habarlady bilim basqarmasynyń basshysy Gúlsim Qojahmetova.
Abzal Núkenov tasymaldaýmen eshqandaı problemalar bolmaýy tıis ekenin tilge tıek etti. Ol atap ótkendeı, balalar sapaly bilim alýy tıis, al shaǵyn jınaqtalǵan mektepterde kadrlar jetispeýshiligi máselesi týyndady.
«Bul májbúrli shara boldy. Biz balalardyń bolashaǵy týraly oılanýymyz qajet, erteń olar bilimdi bolyp shyǵyp, JOO men kolledjderge túsip, mamandyq alýy tıis. Barlyq máselelerdi balalardyń múddelerin eskere otyryp sheshý kerek jáne olardyń quqyqtaryn qorǵaýdy qamtamasyz etý qajet», – dedi oblys ákiminiń orynbasary.
Komıssııa sondaı-aq erekshe bilim berýdi qajet etetin balalardy psıhologııalyq- pedagogıkalyq, áleýmettik jáne medıtsınalyq ońaltý máselelerin qarady.
Abzal Núkenov barlyq baǵyttar boıynsha tapsyrmalar berdi. Ákimniń orynbasary balalar qaýipsizdigin qamtamasyz etýge basa nazar aýdardy.
