Qaraǵandy oblysynda Nura ózeninen eki adamnyń denesi tabyldy

Qaraǵandy. QazAqparat - Qaraǵandy oblysy, Abaı aýdanynyń Samarka aýylynyń mańynda Nura ózeninen eki adamnyń máıiti tabyldy, dep habarlaıdy QazAqparat tilshisi.

18 maýsymda saǵat 21:50-de Abaı aýdany Samarqa aýylynyń mańynda 1986 jyly týǵan áıel men 1987 jyly týǵan er adam joǵalyp ketkeni týraly habar kelip tústi. Іzdestirý-qutqarý jumystaryn júrgizý úshin Qaraǵandy oblysy Tótenshe jaǵdaılar departamentiniń kúshteri jumyldyryldy. Kelesi kúni súńgýir qutqarýshylar joǵalǵandardyń denelerin Nura ózeninen taýyp, alyp shyqty.

«19 maýsym saǵat 15:25-te TJD súńgýir-qutqarýshylarynyń kúshimen Nura ózeninen joǵalǵan áıeldiń denesi tabyldy. Ekinshi joǵalǵan adamnyń denesi 20 maýsymda saǵat 16:05-te izdeý bastalǵan jerden 3,5 shaqyrym jerde Nura ózeninen tabyldy», - dep habarlady Qaraǵandy oblysy TJD baspasóz qyzmeti.

Qazirgi ýaqytta polıtsııa bul adamdardyń óliminiń mán-jaıyn anyqtap jatyr.

«Bul fakt polıtsııada tirkelgen. Qajetti saraptamalar taǵaıyndaldy, olardyń nátıjeleri boıynsha protsessýaldy sheshim qabyldanady», - dep habarlady Qaraǵandy oblysy PD baspasóz qyzmeti.

TJD qyzmetkerleri shomylý kezeńinde qaıǵyly jaǵdaıǵa jol bermeý úshin qaýipsizdik sharalaryn saqtaý kerektigin taǵy da eske salady.

Olar:

- júze almasańyz, belden joǵary sýǵa túspeńiz;

- balalardy qaraýsyz qaldyrmańyz;

- mas kúıinde shomylmańyz;

- beıtanys jerlerde shomylmańyz;

- jaǵadan alys júzbeńiz;

- túnde shomylmańyz.