Qaraǵandy oblysynda «Nur Otan» janynda Qoǵamdyq keńester jumys isteıtin bolady
Epıdemıologııalyq shekteýlerge baılanysty otyrys onlaın formatta ótti. «Sońǵy jyldar biz úshin jumys qabilettiligimiz ben kásibıligimizdi tekserýge baǵyttaldy. Pandemııaǵa qaramastan, biz aýqymdy saıası oqıǵalardyń qatysýshysy boldyq. Búkil el boıynsha ótkizilgen jalpypartııalyq praımerızder jurtshylyqtyń úlken qyzyǵýshylyǵyn týdyrdy. Búginde adamdar elimizdiń qoǵamdyq jáne saıası ómirine belsendi aralasqysy keledi», – dep atap ótti
Nur Otan partııasy oblystyq fılıalynyń tóraǵasy, óńir ákimi Jeńis Qasymbek.
Nur Otan partııasynyń Qaraǵandy oblystyq fılıaly tóraǵasynyń birinshi orynbasary Qadısha Ospanova partııa ótken jyldary qandaı jumys atqarǵanyn jáne jaqyn bolashaqqa belgilengen josparlar týraly aıtyp berdi.
Onyń málimetinshe, praımerız eń bastysy – básekege qabiletti jáne ashyq negizde búkilhalyqtyq senimge laıyq depýtattar korpýsyn qalyptastyrýǵa múmkindik berdi.
Endi halyq qalaýlylary turǵyndardy toqsan saıyn qabyldaýda.
Oblysta partııanyń 23 qoǵamdyq qabyldaý bólmesi jumys isteıdi. Sońǵy eki jylda azamattardan qandaı da bir máselelerdi sheshýge 18 myńnan astam ótinish kelip tústi. Ótinishter negizinen áleýmettik jáne turǵyn úı-kommýnaldyq máselelerge qatysty.
Oblystyq deńgeıde 10 Qoǵamdyq keńes jumys isteıtin bolady. Olardyń árqaısysy partııanyń saılaýaldy baǵdarlamasynyń naqty baǵytymen aınalysady. Aýmaqtyq deńgeılerde osyndaı 108 keńes bolady.
Sondaı-aq, Qadısha Ospanova partııalastaryna jastarmen jumysty kúsheıtý týraly tapsyrma berdi.
«Jasotandyqtar «Jastar Otanǵa» Jol kartasyn júzege asyrý aıasynda oblys jastaryn biriktiretin jáne jumys ádisteri men nysandaryn únemi jetildirip otyratyn ortalyqqa aınalýy tıis», – dep atap ótti ol.
Fılıal QR Táýelsizdiginiń 30 jyldyǵyn merekeleý aıasynda kóptegen is-shara josparlap otyr. Bul – barlyq deńgeıdegi máslıhat depýtattarynyń halyqpen jedel kezdesýleri, «30 ıgi is» qaıyrymdylyq marafony, sondaı-aq konkýrstar, aktsııalar, ardagerlermen kezdesýler jáne taǵy basqa sharalar.
Konferentsııa barysynda Saıası keńes, saıası keńes bıýrosy jáne partııanyń Qaraǵandy oblystyq fılıalynyń baqylaý-tekserý komıssııasy músheleriniń saılaýy ótti.
«Búgin biz óńirlik partııa uıymynyń negizgi baǵyttaryn, bolashaq maqsattarymyz ben mindetterimizdi aıqyndadyq. Osy maqsattarǵa qol jetkizý úshin halyqpen tyǵyz baılanysta jumys isteý, olardyń qajettilikterin eskerý, ózekti máselelerdi sheshý jáne memlekettik baǵdarlamalardyń oryndalýyn baqylaý qajet», – dep túıindedi oblys ákimi Jeńis Qasymbek.
