Qaraǵandy oblysynda nemis tehnologııasymen jumys isteıtin sút fermasy iske qosyldy
ASTANA. QazAqparat - Qaraǵandy oblysy Osakarov aýdanynyń Trýdovoe aýyldyq okrýginde nemis tehnologııasy boıynsha salynǵan sút-taýarlyq fermasy iske qosyldy. Bul týraly oblystyq ákimdiktiń baspasóz qyzmeti habarlady.
«Eńbek-95» JShS Germanııadan sımmental tuqymdy sıyrlardy satyp alǵan.
«Sút óndirý baǵytynda jumysymyzdy bastamas buryn biz jem bazasyn oılastyrdyq. Bıdaı, arpa jáne suly egemiz jáne alqaptardyń jartysyna kópjyldyq jem shópterin ósiremiz. Alqaptardy sýarý úshin arnaıy sýarý qurylǵylaryn ornattyq», - deıdi «Eńbek-95» JShS dırektory Oleg Bezplemıannyı.
Kásiporynnyń aýylsharýashylyq alqaptary 28 myń gektardy quraıdy. Sharýa qojalyǵynda 95 adam jumys isteıdi.
Sút-taýarlyq fermanyń qurylysy jobasy tolyǵymen menshikti qarajatqa salynǵan. Birneshe jylda 780 mln teńge ınvestıtsııa quıylǵan. 19 jańa jumys oryny ashyldy.
«Qazir bizde 243 bas iri qara mal bar, onyń ishinde qunajyndar sany - 130, sıyrlar sany - 59. Birtindep mal basyn kóbeıtip, 600 basqa jetkizemiz», - dep josparlarymen bólisti sharý qojalyǵynyń basshysy.
