Qaraǵandy oblysynda negizgi aýrý túrlerinen qaza bolý deńgeıi tómendedi

QARAǴANDY. QazAqparat - Aımaqta qan qysymynan, jaraqattaný jáne onkologııalyq aýrý saldarynan ajal qushqandar sany azaıdy. Bul málimetter Densaýlyq saqtaý mınıstrliginiń bıylǵy jyldyń 6 aı qorytyndysy boıynsha ótkizgen alqa otyrysynda aıtyldy, dep habarlaıdy QazAqparat tilshisi Qaraǵandy oblystyq Densaýlyq saqtaý basqarmasynyń baspasóz qyzmetine silteme jasaı otyryp.

Resmı málimetterge saı, Qaraǵandy óńirinde qan qysymy júıesi aýrýlarynan qaza bolý 5,7% tómendegen. Mysaly, sońǵy 5 jylda aýyr ınfarkt dertinen qaza bolý 24,8% azaıǵan. Sonymen qatar, 1-jartyjyldyq qorytyndysy boıynsha oblysta mı qan qysymy júıesiniń buzylýy saldarynan bolatyn aýrýlar 16,3%, al ólim jaǵdaılary 8,5% azaıǵan. Jedel járdem qyzmetin modernızatsııalaýdyń arqasynda naýqastardy ınsýlt ortalyqtaryna ýaqtyly jetkizý 91,1% artty.

Qaraǵandy oblysy Densaýlyq saqtaý basqarmasynyń jetekshisi Erjan Nurlybaevtyń sózinshe, qan qysymy júıesi aýrýlarynan qaza bolý deńgeıin azaıtý - medıtsınalyq qyzmetkerler aldynda turǵan basty mindetterdiń biri.

«Infarkt pen ınsýlt jastar arasynda da óte qaýipti. Sondyqtan biz onyń aldyn alýǵa bar kúshimizdi salamyz. Árkim qan qysymyn, qandaǵy qant mólsherin jáne holesterındi ólsheı alady. Ol úshin óz emdeýshi dárigerińe baryp, emhanada profılaktıkalyq tekseristen ótý kerek», - deıdi Erjan Nurlybaev.

Sondaı-aq tekserý kabınetteriniń jumysy arqasynda onkologııalyq aýrýlar erte anyqtala bastaǵan. Bastapqy 0-1 kezeńde qaterli isikti anyqtaý 9,3% artty. Osynyń nátıjesinde 1-jartyjyldyq boıynsha qaterli isikten qaza bolý deńgeıi 22,1% tómendedi.

Jalpy alǵanda, qaıǵyly oqıǵalardan, jaraqattaný men ýlanýdan bolatyn ólim jaǵdaılary 3,4% azaıdy. Bala ólimi 2019 jyldyń 6 aıynda 10,3% azaıǵan.

«Bul kórsetkishterge biz medıtsınalyq uıymdar men 2016 jyly ashylǵan sıtýatsııalyq ortalyqtardyń birlesken jumysy arqasynda qol jetkizip otyrmyz. Búginde Qaraǵandyda negizgi baǵyttar boıynsha 8 ortalyq jumys isteıdi: jaraqattaný, ınsýlt, túberkýlez, ınfarkt, hırýrgııalyq ortalyq, juqpaly aýrýlar ortalyǵy jáne jedel járdem qyzmetiniń birlesken dıspetcherlik júıesi»,- dep atap ótti basqarma jetekshisi.