Qaraǵandy oblysynda múıizi kesilgen 72 óli kıik tabyldy
Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar álemi komıtetiniń tóraǵasy Ashat Qaınarbekov málim etti.
«2019 jyldyń 26 qazanynda «Ohotzooprom» ÓB RMQK Ortalyq óńirlik fılıalynyń jedel toby Nura aýdanynda múıizi kesilgen 30 óli kıik tabyldy. Atalǵan fakt Nura aýdanynyń polıtsııa bóliminde sotqa deıingi tergeýdiń biryńǵaı tizimine tirkelip, Qylmystyq kodekstiń 337-baby 4-tarmaǵy boıynsha is qozǵaldy», - dedi spıker elordada ótken brakonerlikpen kúres týraly brıfıngte.
Al 27 qazan kúni taǵy 42 óli kıik tabyldy. 72 kıiktiń 67-si úlken, 5-ýi - jas tól bolǵan.
«Oqıǵa ornynan «Fetter» markaly 12 kalıbrli 5 gılza tabyldy. Sol kúni «Ohotzooprom» ÓB RMQK jáne Nura aýdanynyń polıtsııasy júrgizgen jedel-izdestirý sharasynda Qonaqaı kóliniń mańynan kıik atqan Toıota markaly eki avtokólik tabyldy. Kólik ıeleri Aqmola men Qostanaı oblystarynyń arasyndaǵy Maılykólge qaraı qashqan. Tártip buzýshylar izdestirilip jatyr. Bul jaǵdaı boıynsha, Nura aýdany ІІB barlyq jeke quramy men Qaraǵandy oblysy boıynsha habar jiberildi», - dep túsindirdi mınıstrliktiń baspasóz qyzmeti.
Eske sala ketsek, QR Ulttyq qaýipsizdik komıteti Qytaıǵa kıik múıizin kontrabandalyq jolmen tasymaldaǵan qylmystyq topty ustaǵan edi. Málimetke saı, olar 1 tonna 118 kg (3 myńnan astam janýar) kıik múıizin shekara asyrmaqshy bolǵan.
Osyǵan baılanysty, Memleket basshysy Qasym-Jomart Toqaev Twitter-degi paraqshasynda quqyq qorǵaý organdaryn kıikti zańsyz qyrǵan qaskóılerdiń áreketine toqtaý salýǵa shaqyrdy.