Qaraǵandy oblysynda múgedektigi bar adamdardyń daýys berýine jaǵdaı jasaldy
Qaraǵandy oblysynda saılaý ýchaskelerin pasporttaý jáne olardy qoljetimdilik kartasyna engizý boıynsha jumystar júrgizildi. Aýmaqtyq komıssııalarǵa jergilikti atqarýshy organdardan múmkindikteri shekteýli adamdar týraly derekter beriledi. Osylaısha, ınteraktıvti qoljetimdilik kartasyna 621 ashyq saılaý ýchaskesi engizildi.
Oblys boıynsha múgedektigi bar azamattar úshin kedergisiz orta jaǵdaılary jasaldy. Daýys berý ýchaskeleri ornalasqan ǵımarattardyń kireberisinde tutqalar, pandýstar ornatylǵan.
«Oblys boıynsha barlyǵy 50 485 múgedektigi bar 18 jastan asqan azamat tirkelgen, onyń ishinde daýys berý kezinde erekshe qajettilikteri bar azamat sany – 4 786, onyń ishinde 1 610 adamnyń kórý qabileti buzylǵan, 1 784-iniń estý qabileti buzylǵan jáne 1 392 adam arbaǵa tańylǵan. 611 ýchaske pandýstarmen, 269 ýchaske túrli taktıldi kórsetkishtermen jabdyqtalǵan», - dep habarlady oblystyq saılaý komıssııasynan.
Sondaı-aq, barlyq ýchaskelerde tirek-qımyl apparaty fýnktsııalary buzylǵan saılaýshylarǵa, onyń ishinde arbaǵa tańylǵandarǵa yńǵaıly bolý úshin jasyryn daýys berýge arnalǵan kabınalar jasaldy. Múgedektigi bar adamdarǵa arnalǵan buryshtar jabdyqtalǵan.
Sonymen qatar, óńirde 5 qala men eki aýdanda ınvataksı qyzmeti uıymdastyrylady. Bul qyzmetti Qaraǵandy, Balqash, Saran, Temirtaý, Shahtınsk, Abaı aýdanynyń turǵyndary paıdalana alady. Sondaı-aq, Buqar jyraý, Nura jáne Osakarov aýdandarynda sýrdoaýdarmashylar jumys isteıdi.
Sońǵy málimetter boıynsha, Qaraǵandy oblysynda saılaýshylar sany – 761 471 adam, onyń ishinde alǵash ret daýys berýshiler – 12 735.
Oblysta barlyǵy 654 saılaý ýchaskesi bar. Barlyq ýchaskeler jumys isteýge daıyn. Úzdiksiz baılanys, elektr energııasy, sý, turaqty telefon baılanysy jáne qajetti tehnıkamen qamtamasyz etilgen. Barlyq ýchaskeler rezervtik qýat kózimen qamtamasyz etilgen. TJD-dan daıyndyq aktileri alyndy.
