Qaraǵandy oblysynda múgedek jandardy qoldaý baǵytynda birqatar joba júzege asyrylmaq

QARAǴANDY. QazAqparat – Qaraǵandy oblysynda kedergisiz orta qurýǵa taǵy bir qadam jasaldy. Arbaǵa tańylǵan múgedekter turatyn oblys ortalyǵyndaǵy kópqabatty úılerge pandýstar salyna bastady. Metsenattar «Jeke tulǵalarǵa arnalǵan 50 pandýs» jobasyn qoldady, dep habarlaıdy QazAqparat tilshisi.

Bul týraly Qaraǵandy oblysy ákiminiń múgedektigi bar adamdar máseleleri jónindegi shtattan tys keńesshisi Nııaz Súndetalıev habarlady. Qoǵam belsendisi birlesken kúsh-jigermen qandaı máselelerdi sheshýge bolatynyn baıandady.

«Bir ǵana mysal keltireıin, shıpajaıǵa emdelýge barǵan kezde birinshi toptaǵy múgedektigi bar adamdardy mekeme qyzmetkerleri alyp júredi. Endi olarǵa jol shyǵyndaryn óteýge 35 AEK mólsherinde tólemder qarastyrylǵan. Bul úlgini biz óńirdiń barlyq aýdandary men qalalaryna taratýdy josparlap otyrmyz», - dep atap ótti Nııaz Súndetalıev.

Oblysta «Invataksı» jumysy turaqty jolǵa qoıyldy. Múmkindigi shekteýli adamdardy tasymaldaý qyzmetteri jergilikti bıýdjet qarajaty esebinen Qaraǵandy, Sátbaev, Saran, Balqash, Jezqazǵan, Shahtınsk qalalarynda, Buqar jyraý, Abaı jáne Osakarov aýdandarynda usynylady. Tasymaldaýshylar avtoparkterinde barlyǵy 42 avtomobıl bar, olardyń 23-i arnaıy kótergish qurylǵylarmen jabdyqtalǵan.

Taǵy bir mindet – kedergisiz orta qurý.

Avtoparkter pandýstarmen jabdyqtalǵan avtobýstar satyp aldy. Avtobýstarda «Aqyldy kólik» mobıldik qosymshasy jumys isteıdi.

Múmkindigi shekteýli jandardy aqparattandyrý úshin bilim, jumyspen qamtýdy úılestirý jáne áleýmettik baǵdarlamalar, dene shynyqtyrý jáne sport, densaýlyq saqtaý basqarmalarynyń Qaraǵandy oblysynyń Eńbek jáne áleýmettik qorǵaý jáne kóshi-qon komıtetiniń departamentimen birlesken Telegram chattary iske qosyldy. Naqty ýaqyt rejıminde óz suraqtaryńyzǵa jaýap ala alasyz.

Múgedek adamdarǵa júrgizýshi kýáligin alý rásimi de jeńildetildi. Olar úshin kólik júrgizý jáne teorııany bilý emtıhandaryn qabyldaý Qaraǵandy mamandandyrylǵan HQKO-da uıymdastyryldy. Emtıhan tapsyrý úshin qolmen basqarylatyn jabdyqtalǵan avtomobıl qarastyrylǵan.

«Ońaltý ortalyqtaryn, túzetý synyptaryn, sport alańdaryn, múgedek adamdarǵa arnalǵan úıirmeler men sektsııalardy damytý boıynsha úlken josparlar bar», - dep tolyqtyrdy Nııaz Súndetalıev.

Oblysta 67 myń adam múgedektigi boıynsha járdemaqy alady. Barlyq qalalar men aýdandarda ákimderdiń múgedektigi bar adamdar máseleleri jónindegi shtattan tys keńesshileri jumys isteıdi.